Польшча створыць уласную спадарожнікавую сістэму сувязі

З KPO Польшча выдзеліць 2 млрд злотых (каля $550 млн) на куплю 6 сучасных камунікацыйных спадарожнікаў. Таксама ў краіне пабудуюць наземную станцыю для кіравання імі. Гэтыя апараты стануць першымі спадарожнікамі сувязі пад польскім кантролем: гаворка не пра арэнду ці сумесныя праграмы, а пра стварэнне ўласнай касмічнай інфраструктуры.

Спадарожнікі павінны забяспечыць стабільную і абароненую сувязь для дзяржаўных устаноў і арміі, а таксама падтрымаць сістэмы маніторынгу, грамадзянскую абарону, крызіснае кіраванне і абарону крытычнай інфраструктуры. Таксама яны забяспечаць інтэрнэтам рэгіёны, дзе сёння сувязь адсутнічае.

Праект стане ўкладам Польшчы ў еўрапейскую праграму IRIS² — сістэму спадарожнікавай сувязі, якая павінна стаць незалежнай альтэрнатывай камерцыйным праектам накшталт Starlink Ілана Маска.

Да гэтага часу Польшча заставалася на перыферыі касмічнай гонкі, абмяжоўваючыся роляй партнёра ў праектах Еўрапейскага касмічнага агенцтва. Цяпер сітуацыя мяняецца: шэсць спадарожнікаў, цэнтр апрацоўкі дадзеных і ўдзел у IRIS² становяцца рэальнымі крокамі да тэхналагічнага суверэнітэту краіны. У эпоху, калі космас вызначае эканоміку, бяспеку і палітыку, гэты праект можа вывесці Польшчу ў новую лігу.