Аддзел навін 24 чэрвеня 2024, 10:45

Польшча выдала беларусам у 4 разы менш працоўных віз

Агульная колькасць усіх віз замежнікам, уключаючы беларусаў, скарацілася ад 50% да 90% у залежнасці ад тыпу віз. Пра гэта паведамляе выданне Rzeczpospolita са спасылкай на звесткі МЗС Польшчы.

3 каментарыя

Агульная колькасць усіх віз замежнікам, уключаючы беларусаў, скарацілася ад 50% да 90% у залежнасці ад тыпу віз. Пра гэта паведамляе выданне Rzeczpospolita са спасылкай на звесткі МЗС Польшчы.

Паведамляецца, што ў гэтым годзе (ад 1 студзеня да 14 чэрвеня) Польшча выдала замежнікам 98 211 рабочых віз. Годам раней такіх віз было выдадзена 284 786.

Больш за ўсё працоўных віз сёлета было выдадзена ўкраінцам (47 257), беларусам (32 233) і грузінам (3659). Летась грамадзянам Беларусі было выдадзена 114 598 такіх віз, грамадзянам Украіны — 107 354 віз. Таксама ў топ-3 увайшлі грамадзяне Турцыі (8257 працоўных віз).

Польшча таксама абмежавала выдачу гуманітарных віз. Летась беларусам і грамадзянам іншых краін было выдадзена 4539 такіх віз. Сёлета Польшча выдала толькі 542 гуманітарныя візы. Сярод атрымальнікаў ёсць беларусы.

Зменшылася і колькасць шэнгенскіх турыстычных віз — ад 105 223 за ўвесь мінулы год да 40 316 сёлета.

Таксама ад канца студзеня гэтага года Польшча перастала выдаваць беларусам візы РВН. На думку МЗС Польшчы, візы па праграме «Poland. Business Harbour» часта выкарыстоўваліся «для мэт, несумяшчальных з яе прызначэннем». Улады лічаць, што ў рамках РВН «абсалютна бескантрольна былі ўвезеныя ад 50 да 90 тысяч замежнікаў».