У Польшчы «згубіліся» 80 тысяч уладальнікаў віз PBH — медыя

Паводле інфармацыі Rzeczpospolita, ад 2020 года да 30 верасня 2023 года МЗС Польшчы выдала 93 512 віз РВН. З іх 88 529 атрымалі беларусы, 2524 —расіяне, 1471 — украінцы. Аднак, паводле даных памежнай службы Польшчы, ад 2020 года ў Польшчу па візах РВН заехала толькі 13,5 тыс. чалавек.

Ні ў Міністэрстве развіцця і тэхналогій, ні ва ўрадзе выданню не змаглі патлумачыць, куды зніклі яшчэ 80 тысяч уладальнікаў PBH.

«Магчыма, напрыклад, беларускія кампаніі, якія пераехалі ў Польшчу, наймаюць спецыялістаў, якія працуюць аддалена? Гэта, несумненна, мае патрэбу ў праверцы», — мяркуе падатковы кансультант Антоні Колек.

Зрэшты, усё можа быць куды прасцей, ніж бачыцца польскаму выданню. Уладальнікі віз маглі ўехаць у Польшчу праз іншыя краіны, таму польскія памежныя службы іх не зафіксавалі. Напрыклад, многія беларусы прыехалі ў Польшчу праз Літву або Латвію.

Таксама ёсць людзі, якія атрымлівалі візы па другім і нават трэцім разе, што павялічыла толькі колькасць выдадзеных віз, а не колькасць іх атрымальнікаў.

Акрамя таго выклікае пытанні агульная статыстыка колькасці выдадзеных віз PBH. Rzeczpospolita паведамляе аб выдачы амаль 94 тысяч віз. Між тым, паводле афіцыйных даных, толькі беларусам на 30 чэрвеня 2023 года было выдадзена амаль 114 тысяч віз РВН.

Між тым візы PBH хвалююць і польскую апазіцыю. У «Грамадзянскай кааліцыі» пераймаюцца, што айцішнікі, якія атрымалі візы, не працуюць у ІТ або — яшчэ горш — працуюць над урадавымі заказамі.

— Ад пачатку расійска-ўкраінскай вайны беларусам выдадзена 65 тысяч віз, а мы ведаем, якую дапамогу Беларусь аказвае ў гэтай вайне Расіі. Яшчэ 1700 віз было выдадзена расійцам. 

Канцылярыя прэм’ера не змагла даць даныя, дзе гэтыя «праграмісты» (двукоссе дэпутат адлюстраваў пальцамі. — dev.by) працуюць. Ці працуюць яны ў Польшчы, ці працуюць яны ў кампаніях, якія выконваюць дзяржзаказы, звязаныя з ІТ-рашэннямі, крытычна важнымі для функцыянавання дзяржавы. Адказаў на гэтыя пытанні ў канцылярыі прэм’ер-міністра мы не знайшлі.

Гэта турбуе нас. Калі польская дзяржава не ведае, дзе працуюць праграмісты, якія тысячамі прыехалі з Расbі і Беларусі ў апошнія два гады, то мы ў вельмі небяспечнай сітуацыі, — заявіў на перадвыбарнай прэс-канферэнцыі ў кастрычніку дэпутат Сейма ад «Грамадзянскай кааліцыі» Ян Грабец. 

Польскім палітыкам пазней адказаў Python-распрацоўшчык з Беларусі. Ён запэўніў, што айцішнікі з Беларусі не хаваюцца, іх лёгка знайсці ў тэлеграм-чатах. А працуюць яны, як правіла, у польскіх аддзелах міжнародных карпарацый або наўпрост з заказчыкамі як ІП. Што да ўдзелу беларусаў у польскіх дзяржзаказах з доступам да дзяржсакрэтаў, наўрад ці ім гэта цікава — проста амерыканцы плацяць больш і ў іншай валюце.