Карыстальнікі Minecraft зладзілі мітынг каля помніка Жырыноўскаму і абрынулі сервер

Афіцыйны сайт партыі ЛДПР сцвярджае, што лічбавая дэманстрацыя ў Minecraft каля 200-метровага помніка заснавальніку партыі стала «самым масавым мітынгам», які прайшоў 1 мая ў Расіі. У нейкі момант сервер упаў, не вытрымаўшы наплыву наведвальнікаў. На піку ў мерапрыемстве бралі ўдзел каля 12 тысяч чалавек. Агульная колькасць тых, хто наведаў дэманстрацыю, дасягнула 18 тысяч карыстальнікаў, заявіў прэс-сакратар ЛДПР Аляксандр Дзюпін.

200-метровую скульптуру Жырыноўскага стварыў невядомы карыстальнік, аднак помнік выявіўся не надта падобным да самога палітыка. У партыі заявілі, што ў далейшым маюць намер выкарыстоўваць платформу ды іншыя магчымасці лічбавага свету для камунікацыі з выбаршчыкамі і прыцягнення новых прыхільнікаў.