Карыстальнікі зноў перайгралі Microsoft: яна забараніла ўсталёўваць Windows 11 без акаўнта, але пратрымалася нядоўга

Microsoft пастаянна ўзмацняе патрабаванні да выкарыстання акаўнта пры ўсталёўцы Windows 11, тлумачачы гэта неабходнасцю павышэння бяспекі і зручнасцю выкарыстання. Кампанія заявіла пра выдаленне скрыпту bypassnro.cmd, які раней дазваляў завяршыць усталёўку сістэмы без падлучэння да інтэрнэту і ўводу дадзеных уліковага запісу Microsoft.

У актуальных стабільных версіях Windows 11, уключаючы абнаўленне 24H2, гэты скрыпт пакуль застаецца даступным. Абмежаванне закранула толькі тэставую зборку Windows Insider у Dev Channel. Аднак цалкам верагодна, што гэты скрыпт будзе выдалены з публічных версій Windows 11 ужо з выхадам абнаўлення 25H2 восенню гэтага года.

Карыстальнікі Windows Insider знайшлі новы абыходны шлях. Каб стварыць лакальны ўліковы запіс, цяпер на этапе выбару краіны ў працэсе ўсталёўкі сістэмы трэба выклікаць камандны радок спалучэннем клавіш Shift + F10. У адкрытым акне неабходна ўвесці каманду start ms-cxh:localonly (без двукоссяў). Пасля гэтага сістэма прапануе стандартны інтэрфейс для ўводу дадзеных лакальнага ўліковага запісу, і ўсталёўку можна будзе працягнуць у звычайным рэжыме.

Гэты метад не патрабуе перазапуску ўсталёўкі Windows. Раней існавалі і іншыя спосабы абыходу патрабавання акаўнта Microsoft, уключаючы адключэнне інтэрнэту падчас устаноўкі або выкарыстанне спецыяльных каманд. Аднак Microsoft рэгулярна закрывае падобныя «лазейкі» ў новых зборках сістэмы. Многія карыстальнікі аддаюць перавагу лакальным уліковым запісам з меркаванняў прыватнасці і незалежнасці ад экасістэмы Microsoft. На іх думку, кампанія выкарыстоўвае акаўнты для маніторынгу актыўнасці карыстальнікаў з мэтай прасоўвання сваіх прадуктаў і паслуг.