Папугаяў навучылі тэлефанаваць сабратам па відэасувязі, і яны сталі пачувацца шчаслівейшымі

У рамках эксперымента папугаяў навучылі званіць у званок, каб даць ведаць, што яны хочуць зрабіць відэавыклік. Пасля гэтага ім паказвалі планшэт з фотаздымкамі «сяброў». Паддоследныя маглі самі выбраць, якой птушцы патэлефанаваць. За перыяд даследавання папугаі зрабілі адно аднаму 147 званкоў, а ўладальнікі птушак тым часам у падрабязнасцях фіксавалі іх паводзіны.

Аўтары даследавання адзначаюць, што відэасувязь вельмі дапамагла многім людзям даць рады лакдаўну і самоце падчас пандэміі. Яны задумаліся, ці магло б гэта прынесці карысць папугаям таксама. Па выніках апрацоўкі 1 тысячы гадзін відэазапісаў 18 папугаяў адказ выявіўся станоўчым.

У натуральным асяроддзі многія віды папугаяў жывуць вялікімі зграямі, але, робячыся хатнімі гадаванцамі, апынаюцца пад замком адныя або ў маленькіх групах. Ад нуды і ізаляцыі ў птушачак могуць развіцца псіхалагічныя праблемы: яны могуць разгойдвацца і блукаць з боку ў бок або нават прычыняць сабе шкоду, напрыклад, вырываць пёры.

Папугаі, якія ўдзельнічалі ў эксперыменце, пачалі праяўляць больш сацыяльныя паводзіны — даглядаць пер’е, спяваць і гуляць. А ўзаемадзеянне птушак па відэа было вельмі падобным да жывых зносін.