Група інвестараў накіравала ліст радзе дырэктараў Tesla з патрабаваннем, каб генеральны дырэктар Ілан Маск прысвячаў працы ў кампаніі не менш за 40 гадзін на тыдзень, паколькі, на іх думку, яна перажывае «крызіс».
Група інвестараў накіравала ліст радзе дырэктараў Tesla з патрабаваннем, каб генеральны дырэктар Ілан Маск прысвячаў працы ў кампаніі не менш за 40 гадзін на тыдзень, паколькі, на іх думку, яна перажывае «крызіс».
«Ваганні кошту акцый Tesla, падзенне продажаў, а таксама трывожныя паведамленні пра парушэнні ў галіне правоў чалавека ў кампаніі і падзенне яе глабальнай рэпутацыі выклікаюць сур’ёзную заклапочанасць», — гаворыцца ў лісце, адрасаваным старшыні рады дырэктараў Tesla Робін Дэнхолм.
«Шматлікія праблемы звязаныя з дзеяннямі пана Маска па-за межамі яго ролі як генеральнага дырэктара Tesla, уключаючы яго прыкметную ролю як стваральніка Дэпартамента эфектыўнасці дзяржаўнага кіравання ЗША (DOGE)», — дадалі інвестары.
Аўтары ліста патрабуюць, каб рада дырэктараў Tesla абавязала Маска працаваць у кампаніі не менш за 40 гадзін на тыдзень як умову для любога новага плана кампенсацыі. Акрамя таго, яны настойваюць на распрацоўцы выразнага плана пераемнасці кіраўніцтва і ўвядзенні палітыкі, якая абмяжоўвае ўдзел дырэктараў Tesla у радах іншых публічных і прыватных кампаній.
У пачатку мінулага года суд штата Дэлавэр пастанавіў ануляваць пакет кампенсацый Маска за 2018 год, які ацэньваўся прыкладна ў 56 мільярдаў даляраў. Суд усталяваў, што Маск кантраляваў кампанію, а камітэт па кампенсацыях рады дырэктараў увёў акцыянераў у зман перад галасаваннем за яго зацвярджэнне. Цяпер Маск заяўляе, што хоча атрымаць яшчэ больш акцый, каб забяспечыць сабе 25% галасоў у кампаніі.
Рэпутацыя і брэнд Tesla пагоршыліся з 2024 года, у асноўным праз правакацыйную рыторыку Маска і яго палітычную актыўнасць. Акрамя інвестыцый амаль у 300 мільёнаў долараў на падтрымку Дональда Трампа, Маск публічна падтрымаў крайне правую партыю AfD у Германіі перад парламенцкімі выбарамі ў гэтай краіне. У межах DOGE Маск узначаліў ініцыятыву адміністрацыі Трампа па скарачэнні федэральных ведамстваў.
Інвестары, якія падпісалі ліст, валодаюць прыкладна 7,9 мільёна акцый кампаніі, што складае каля 0,25% ад агульнай колькасці акцый. Яны абвінавачваюць раду дырэктараў Tesla ў тым, што яна «не жадае дзейнічаць у інтарэсах усіх акцыянераў», не патрабуючы ад Маска поўнай увагі да спраў кампаніі.
Рэлацыраваліся? Цяпер вы можаце каментаваць без верыфікацыі акаўнта.