Партугалія скасавала часовую абарону беларусаў, якія ўцяклі ад вайны ва Украіне. Яны баяцца пераследу на радзіме
Упраўленне па пытаннях інтэграцыі, міграцыі і прытулку Партугаліі (AIMA) загадала выехаць некаторым грамадзянам Беларусі, якія знаходзяцца тут пад часовай абаронай. Пра гэта піша «Еўрапейская праўда» са спасылкай на тэлеканал SIC Notícias.
Такі загад атрымалі беларусы, якія прыехалі ў Партугалію з Украіны пасля нападу Расіі і атрымалі статус часовай абароны. У іх ёсць 20 дзён, каб добраахвотна пакінуць краіну, інакш іх могуць дэпартаваць.
Некаторыя беларусы распавялі, што выехалі з Беларусі яшчэ ў 2020 годзе, бо ўдзельнічалі ў пратэстах. Некаторыя публікавалі пасты ў сацсетках у падтрымку Украіны і супраць Лукашэнкі — яны апасаюцца арышту пры вяртанні.
У AIMA на запыт SIC Notícias сказалі, што любая асоба са статусам часовай абароны можа атрымаць загад аб добраахвотным выездзе. Вядомы выпадак, калі Партугалія адмяніла часовую абарону для 10-гадовай дзяўчынкі, якая нарадзілася ў Расіі ў сям'і ўкраінскіх бацькоў. Як патлумачыў адвакат сям'і, у AIMA лічаць, што «дзіця можа вярнуцца ў сваю краіну паходжання, паколькі там няма канфлікту». Ці павінны беларусы на часовай абароне вярнуцца ў ваюючую Украіну, ці мяркуецца, што ў Беларусі спыніліся пераследы па палітычных матывах, няясна.
«Еўрапейская праўда» адзначае, што ў ЕС падоўжана дзеянне Дырэктывы аб часовай абароне для ўкраінцаў да 4 сакавіка 2027 года. Некаторыя краіны саюза давалі такі статус і замежнікам, якія выехалі з Украіны пасля пачатку вайны, але паступова яго скасоўваюць.
Читать на dev.by