Апошнія свіфты ў Беларусь закрываюцца. Што робяць айцішнікі

Атрымліваць валютныя пераказы з-за мяжы ў Беларусі ўсё складаней. Вось і Прыёрбанк, апошняя апора ўваходных валютных свіфтоў, ад 15 мая губляе амерыканскі банк-карэспандэнт Citibank NA і спыняе аперацыі ў USD па карэспандэнцкім рахунку. 

Паводле інфармацыі dev.by, для некаторых ІТ-кампаній, што абслугоўваюцца ў Прыёрбанку, гэта стала апошнім аргументам, яны прапаноўваюць супрацоўнікам пераехаць або звольніцца.

dev.by спытаўся ў чытачоў, чые інтарэсы пакутуюць праз «адміранне» доларавых плацяжоў, як яны вырашаюць праблему.

Экс-супрацоўнік: офіс закрываецца, хто не хоча ехаць — на мароз

Невялікая прадуктовая кампанія ў фінансавай сферы, абслугоўваецца ў Прыёрбанку. Мінскі офіс «закрываецца» — пакідаюць толькі бухгалтара і прыбіральшчыцу, бо кампанія ў спісе забароненых да продажу. Прычына — немагчымасць заводзіць грошы ў Беларусь і плаціць заробкі.

Ахвотныя могуць атрымаць PBH і з’ехаць у Польшчу, каб там працягнуць супрацоўніцтва з кампаніяй праз ІП. Кампанія з пераездам ніяк не дапамагае. Хто не хоча — на мароз, з кампенсацый аднаго заробку.

Такое рашэнне супрацоўнікам агучылі раптоўна дзесьці ў сярэдзіне сакавіка. Не ведаю, якую інфармацыю атрымала кіраўніцтва кампаніі (пра спыненне супрацоўніцтва з Citibank NA стала вядома толькі ў красавіку. — dev.by), але ўжо тады была нейкая сумятня з Прыёрам. Раней пра такія планы гаворкі не было.

У мяне няма статыстыкі, колькі супрацоўнікаў рашаюць пераехаць, а колькі — звольніцца, але, паводле адчуванняў, людзі ў асноўным звальняюцца. Проста тыя, хто хацеў і мог з’ехаць, зрабілі гэта раней, — траціна супрацоўнікаў і так ужо працавала з Польшчы ды іншых лакацый. Звальняюць дробнымі групамі раз на тыдзень, каб бухгалтарам і кадравікам было зручна.

Фрылансер: ніводны банк не гарантуе паспяховага SWIFT-пераказу

Працую з кліентамі з Аўстраліі. Атрымліваў SWIFT-пераказы на рахунак у Прыёрбанку, але цяпер гэта ўжо немагчыма.

Я адкрыў спіс усіх банкаў РБ, выкрасліў адтуль усе падсанкцыйныя і з расійскім следам банкі, а ў астатнія патэлефанаваў з пытаннем пра плацяжы з Аўстраліі.

Станоўча мне адказалі ў трох: БСБ, Цэптар банку і Тэхнабанку. Але, як толькі я пачаў паўторна звяртацца да іх у пісьмовай форме, адразу з’явілася купа нюансаў. 

Дзесьці проста адказваюць «не, немагчыма», дзесьці кажуць, што з іх боку абмежаванняў на прыём плацяжоў няма, але яны могуць быць у банкаў-карэспандэнтаў. Дзесьці скідваюць спіс банкаў, з якіх пераказы даходзяць.

Цікава атрымалася з БСБ. Патэлефанаваў ім — сказалі, што прыняць плацеж з Аўстраліі ў доларах могуць. Потым напісаў у бот — сказалі, што не. Маўляў, як толькі плацеж зойдзе на тэрыторыю ЗША, яго абавязкова развернуць.

Тэхнабанк мае карэспандэнцкія рахункі ў Казахстане ў USD, але потым пераказ ідзе на амерыканскі банк. Як гэта спрацуе, незразумела.

БНБ адказалі вось што:

У кол-цэнтры Цэптар Банка мне сказалі, што пераказ мае прыйсці. У іх такая логіка была: калі з Эміратаў нядаўна прыйшоў плацеж, то і з Аўстраліі мае прыйсці. Я ўсё роўна ў гэта слаба веру. Цэптар, здаецца, ганяе грошы праз Raiffeisen. Не разумею, чаму ў іх мае атрымацца, калі ў іншых не працуе.

Напісаў ім ліст — цішыня. Пэўна, буду яшчэ ім пісаць.

Вось адказ з Парытэтбанка. У іхнім спісе не знайшлося майго банка.

Такім чынам, гарантый мне нідзе не даюць. Прапануюць мне самому даведвацца на баку адпраўніка, ці дойдзе іхні пераказ. Уяўляю, як я прапаноўваю сваім кліентам тэлефанаваць у банк і ўдакладняць.

Увогуле, упэўненасці няма ў аніводным банку, на свіфты разлічваць нельга. Адзінае, што абнадзейвае — опцыя з Paysend, пра якую вы напісалі ў сваім артыкуле. Думаю, буду прасіць заказчыка рабіць пераказы праз гэты сэрвіс. Так, чытаў пра спісанні, але ж гэта быў тэхнічны момант: яны не разлічылі гэтых курсаў у сваёй бізнэс-мадэлі і на ляту змянілі ўмовы. 

І яшчэ: калі б не ППД, які дазваляе атрымліваць узнагароду на картку, я не ведаю, як бы я цяпер атрымліваў грошы і плаціў падатак. Бо ІП, наколькі ведаю, працуюць толькі з пераказамі на рахунак. 

Заснавальнік геймдэў-кампаніі: застаецца працаваць пад заказ іншай кампаніі або шукаць выдавецтва ў «нейтральнай» краіне

Мы распрацоўваем відэагульні, выпускаем прадукты ў Steam. Выплаты атрымлівалі на рахунак у Прыёрбанку праз банк-карэспандэнт Citibank NA. На дзіва, выплата пры канцы красавіка прайшла — верагодна, апошняя. 

Каб атрымліваць плацяжы далей, разглядаем БСБ і БНБ. У іх доларавы карэспандэнт Raiffeisen. Аднак ёсць рызыка, што і там плацяжы «адваляцца». Па вялікім рахунку, з пачаткам праблем у Прыёра не засталося ўстойлівых да цяперашняй сітуацыі банкаў.

Варыянтаў застаецца не вельмі шмат. 

• Спрабаваць працаваць на ўнутраны або расійскі рынак.

На расійскім рынку яшчэ можна спрабаваць у геймдэў. Вядома, абароты не тыя, што на глабальных пляцоўках, але паспрабаваць варта.

А на беларускім рынку адзіны варыянт — працаваць пад заказ канкрэтнай арганізацыі. Мы робім захады ў бок распрацоўкі софту ў сферы камп’ютарнага праектавання і аптымізацыі сістэм. 

• Рэлакаваць кампанію. Але гэта не варыянт, у нашай маленькай каманды пакуль няма магчымасці з’ехаць. 
• Працаваць праз выдавецтвы ў іншых краінах. Многія краіны дагэтуль пераказваюць грошы ў РБ нават без банка-карэспандэнта. Некаторыя могуць нават у крыптавалюце.

Два месяцы таму паступала прапанова ад аднаго канадскага выдавецтва. Схема такая:

1. Яны выдаюць наш прадукт на пляцоўцы Steam пад сваім імем.
2. Усе грошы ад продажаў паступаюць на іх рахунак.
3. Выдавецтва раз на квартал у адпаведнасці з дамовай пераказвае нашую долю прыбытку з канадскага рахунку на беларускі.

А, Канада ўвяла санкцыі супраць Прыёра? Тады, на жаль, з Канадай ужо не атрымаецца.

Надзейнейшым падаецца варыянт, калі выдавецтва знаходзіцца ў «нейтральнай» дзяржаве, якая прымае плацяжы з ЗША, і можа адпраўляць іх у Беларусь. Напрыклад, у Казахстане.

Атрымліваецца, што рэальныя опцыі такія:

1. Расійскі рынак.
2. Пошук кліентаў у РБ і праца пад заказ.
3. Бегаць з банка ў банк, атрымліваючы пераказы з ЗША, пакуль яны прыходзяць.

Пакуль сочым за сітуацыяй, рыхтуемся да любых варыянтаў.

Заснавальнік сэрвіснай кампаніі: калі што, пяройдзем на еўра

Мы абслугоўваемся ў Прыёры. Калі плацяжы ў доларах спыняць, значыць, пяройдзем на еўра.

Вядома, пасылаць еўра з ЗША не рашэнне. У нас delivery chain пабудаваны так, што ўсе заказы сцякаюцца ў штаб-кватэру ў Германіі, а адтуль ужо ідзе іх размеркаванне (і грошай таксама) па дэліверы-цэнтрах у розных краінах. Так што рашэнне для нас простае — пры разліках галаўнога офіса з беларускім не ўжываць долары ў якасці валюты плацяжу.

Ну, гэта пакуль ЕС не наклаў санкцыі на Прыёр.

Гіпатэтычна яшчэ застаецца варыянт заводзіць грошы праз «зусім трэція краіны», напрыклад, Казахстан, Турцыю і да т. п. Але для гэтага там трэба адкрываць юрыдычныя асобы.

Сябар айцішніка: дамаўляецеся пра крыпту — і вуаля!

Калі вы «фізік», атрымаць ад заказчыка грошы даволі лёгка: проста дамаўляецеся аплачваць у крыпце і — вуаля. Не, гэта не я — сябар так атрымлівае. Можна проста запасіць, а потым злятаць у Турцыю/Грузію і прывезці гатоўку. Або вывесці праз біржу.

Ад dev.by. Падатковая РБ не лічыць легальным атрыманне ўзнагароджання за працу ў крыптавалюце. Пра выплату падаткаў наш чытач таксама нічога не кажа. Так што наўрад ці прапанаваны спосаб вырашае праблему.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў.

Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 170 чытачоў падтрымліваюць нас данатамі. У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.

Пераказаць грошы. Якія опцыі яшчэ адкрытыя для Беларусі

Па тэме

Пераказаць грошы. Якія опцыі яшчэ адкрытыя для Беларусі

Як маюцца айцішнікі, якія плацяць новы падатак 10%. «Складана накасячыць»

Па тэме

Як маюцца айцішнікі, якія плацяць новы падатак 10%. «Складана накасячыць»