«Бюджэт» у БДУІР губляе прывабнасць. Заяў на 11% менш, чым летась

Агульны набор студэнтаў

Агульны планавы набор студэнтаў на дзённую форму сёлета амаль не змяніўся ў параўнанні з мінулым годам — 2100 чалавек (у 2023 — 2114).

Колькасць месцаў на дзённую бюджэтную форму навучання вырасла на 7% да 1190 (у 2023 годзе — 1103 месцы).

У той жа час набор платнікаў на дзённую форму скараціўся на 10% — са 1009 (у 2023) да 910 чалавек.

149 бюджэтных месцаў было выдзелена для тых, хто паступае па-за конкурсам або без уступных экзаменаў. Летась для гэтай катэгорыі абітурыентаў было выдзелена амаль столькі ж месцаў (147). 

Хто на бюджэт

Калі арыентавацца на колькасць пададзеных заяў, то цікавасць вучыцца на бюджэце ў БДУІР прыкметна ўпала. Колькасць ахвотных — мінімальная за апошнія тры гады.  

На выдзеленыя бюджэтныя месцы пададзена ўсяго 1400 заяў ад абітурыентаў — на 11% менш, чым летась (1577 заяў), і на 4% менш, чым у 2022 (1460 заяў). 

Папулярныя/непапулярныя факультэты

Факультэт камп’ютарных сістэм і сетак застаецца самым папулярным. Абітурыенты падалі 467 заяў — на 16% менш, чым год таму (543).

Факультэт інфармацыйных тэхналогій і кіравання на другім месцы па папулярнасці, але і тут адмоўная дынаміка: 353 заявы сёлета супраць 396 летась — мінус 11%. 

Інжынерна-эканамічны факультэт і факультэт радыётэхнікі і электронікі і летась былі самымі непапулярнымі — ахвотных вучыцца там было на 20%+ менш. Цяпер жа лічбы падраслі: на ІЭФ падалі заявы 155 абітурыентаў (супраць 140 летась) — гэта +11%, на РЭФ — 74 (супраць 65 у 2023 годзе) — то-бок +14%. 

Усё ідзе па плане?

Агульны конкурс на дзённую бюджэтную форму навучання ў БДУІР сёлета (без уліку мэтавікоў) — 1,23 чалавека на месца.

На некаторыя факультэты і спецыяльнасці пакуль недабор. Так, план па месцах на факультэце радыётэхнікі і электронікі — 224, а заяў пададзена ўсяго 74. 

Частка спецыяльнасцяў таксама не ў фаворы: напрыклад, на камп’ютарную інжынерыю (факультэт камп’ютарнага праектавання) падаліся 22 чалавекі, а ў планах набраць 30, электроннае машынабудаванне выбралі 9 абітурыентаў, а план — на 25.

На факультэце інфармацыйных тэхналогій і кіравання менш за ўсё каціруюцца кіберфізічныя сістэмы: усяго 20 заявак ад абітурыентаў, а ў плане — 50. На факультэце інфармацыйнай бяспекі ўсяго 52 заявы ад тых, хто хоча вывучаць сістэмы і сеткі інфакамунікацый — а ў плане набору паказаная колькасць 129. 

Але трэба браць пад увагу, што ў статыстыцы, якую апублікаваў БДУІР, колькасць пададзеных заяў адлюстроўваецца па першай спецыяльнасці, названай абітурыентамі ў заяве. Пры канчатковым залічэнні ўсе бюджэтныя месцы будуць размеркаваныя.