«Знайсці новую працу няпроста». Рэлаканта звальняюць з UBS (мінус 1200 чалавек толькі ў Польшчы) Вось што распавёў рэлакант

Швейцарская фінансавая група UBS пачала масавыя звальненні ў Польшчы, анансаваныя яшчэ на пачатку года. Рашэнне закране прыкладна 1200 супрацоўнікаў, а філіял у Варшаве ў офісным будынку Atrium II закрыюць цалкам. Пры гэтым у каментары для Money.pl кампанія запэўніла, што захавае цэнтры ў Кракаве і Ўроцлаве. Зараз у Польшчы на UBS працуюць каля 8700 чалавек.

Рашэнне аб звальненні супрацоўнікаў у польскіх філіялах стала часткай глабальнай палітыкі кампаніі пасля паглынання ёю другога па велічыні пасля UBS швейцарскага фінансавага кангламерата Credit Suisse. Яшчэ вясной 2024 года UBS абвясціў аб планаваным скарачэнні больш за 30 000 пасад, 11 000 з якіх знаходзяцца ў Швейцарыі.

Адзін з супрацоўнікаў уроцлаўскага бранча UBS распавёў devby, што афіцыйна аб скарачэнні супрацоўнікам абвясцілі ў пачатку мінулага тыдня:

— У пачатку года нам анансавалі скарачэнні і распавялі, якую частку людзей яно закране ў працэнтных суадносінах. За мінулы час частка людзей ужо паскарачалі, але гэта былі адзінкавыя выпадкі. А зараз на вялікім афлайн-сходзе нам абвясцілі аб гэтым афіцыйна, і цяпер звальненні будуць адбывацца масава. Скарачэнні тычацца ў тым ліку тэхнічных спецыялістаў з Tech Services.

Кампенсацыю звольненым будуць выплачваць, але дакладныя сумы не падкажу, лічбаў не памятаю. Пра магчымасць замест звальнення пераехаць да іншага месца працы нічога не казалі. Пасля сходу стаяла цішыня, людзі пераварвалі тое, што здарылася.

Праца ў нас спецыфічная. Яна хоць і тэхнічная, але моцна прывязана да банкаўскага сектара. Тым, каго скароцяць, працу будзе шукаць не проста.