У Мінску ўпалі продажы кватэр — рынак страціў 20% пакупнікоў

Колькі кватэр купілі

Паводле даных Нацыянальнага кадастравага агенцтва, у верасні ў Мінску было зарэгістравана 1606 угод па продажы кватэр. Гэта крыху менш, чым у папярэднія месяцы. Напрыклад, у жніўні было зарэгістравана больш за 1,7 тысячы ўгод. 

Дарагія крэдыты

Асноўны драйвер продажаў жылля ў Мінску — крэдытаванне, адзначае кіраўнік групы кампаній «Твая сталіца» Уладзімір Давідовіч.

Паводле яго слоў, яшчэ два месяцаў таму, калі крэдытныя стаўкі ў сярэднім былі на ўзроўні 14-15%, гэта давала рынку 38-40% пакупнікоў, якія без крэдытнай падтрымкі не змаглі б купіць кватэру. Калі б не даступнасць крэдытаў, то, паводле ацэнак аналітыкаў агенцтва, штомесяц у Мінску прадавалася б не больш за 1200 кватэр. 

Аднак за жнівень стаўкі па крэдытах ужо падняліся з сярэдніх 14-15% да 16-17%. Да таго ж банкі пастрожылі патрабаванні да фінансавага стану крэдытаатрымальнікаў: раней ухваленне атрымлівалі 95% суіскальнікаў, цяпер — менш за 85%. Гэта знізіла долю крэдытных пакупнікоў. 

Новыя ўмовы для тых, хто жыве ў нястачы

Намеснік начальніка аддзела кансалтынгу і аналітыкі «Тваёй сталіцы» Андрэй Чарнышоў звяртае ўвагу яшчэ на адзін фактар. Пачынае ўплываць на рынак змяненне правілаў крэдытавання льготнікаў.

Тыя, хто жыве ў нястачы і раней меў доступ да льготнага крэдытавання, карысталіся гэтай магчымасцю, купляючы жыллё ў сталіцы, а не ў сябе ў рэгіёне. Цяпер умовы змянілі — крэдытныя сродкі можаш траціць толькі там, дзе стаіш на чарзе. 

— Атрымліваецца, што Мінск губляе блізу 20% пакупнікоў. То-бок пацярпелі прадаўцы хрушчовак, брэжневак, панэлек 70-х гадоў. Яны страцілі значную частку попыту. І калі яшчэ месяц-два таму пад крэдыты куплялі каля 40% кватэр, то цяпер гэтая лічба ўпала да 35%.  Калі стаўка далей пойдзе ўверх або павялічыцца курс долара, попыту няма на чым будзе стаяць, — адзначае аналітык.

Якія кватэры самыя запатрабаваныя 

Паводле слоў Андрэя Чарнышова, выстаўленыя на продаж кватэры зыходзячы з іх запатрабаванасці можна падзяліць на тры групы. 

Першая група — гэта самыя ліквідныя кватэры, якія знаходзяцца ў «свежых» дамах — да 10 гадоў, побач з метро або ў лакацыях з развітой інфраструктурай. У саміх кватэрах зроблены добры рамонт. У прадаўцоў такіх аб’ектаў ёсць магчымасць прадаць іх па цане вышэйшай за сярэднерынкавую.

Знаходзяцца ў топе попыту і кватэры ў дамах да 20 гадоў, калі жыллё таксама мае добры рамонт, дом выглядае акуратным, агульная тэрыторыя дагледжаная.

У другую групу ўваходзяць кватэры, якія прадаюцца па сярэдняй цане. Такія варыянты могуць патрабаваць касметычнага рамонту, але не глабальнага, накшталт замены аконных праёмаў, дзвярэй, усёй сантэхнікі і г. д. 

У трэцюю групу ўваходзяць кватэры з коштам ніжэйшым за сярэдні па рынку. У іх прадаўцоў няма магчымасці разлічваць на рост цаны. Гэта кватэры, дзе патрабуюцца маштабныя змены, і якія знаходзяцца дамах без капітальнага рамонту.