Алеся Чапкевич world 7 кастрычніка 2025, 16:50

Прафесар інфарматыкі кажа, што зараз усім цяжка знайсці працу, а ў індустрыі адбываецца нешта дзіўнае

Прафесар Каліфарнійскага ўніверсітэта ў Берклі Хані Фарыд у падкасце Particles of Thought адзначыў, што яшчэ чатыры гады таму дзецям раілі ісці вывучаць інфарматыку і ісці ў ІТ, бо гэта шлях да выдатнай, абароненай кар’еры. Але ўсё цалкам змянілася на подзіў хутка.

4 каментарыя

Прафесар інфарматыкі кажа, што зараз усім цяжка знайсці працу, а ў індустрыі адбываецца нешта дзіўнае

Прафесар Каліфарнійскага ўніверсітэта ў Берклі Хані Фарыд у падкасце Particles of Thought адзначыў, што яшчэ чатыры гады таму дзецям раілі ісці вывучаць інфарматыку і ісці ў ІТ, бо гэта шлях да выдатнай, абароненай кар’еры. Але ўсё цалкам змянілася на подзіў хутка.

Па словах Фарыда, нельга проста ўсё зваліць на штучны інтэлект. «У індустрыі нешта адбываецца. Думаю, гэта сукупнасць многіх фактараў. Так, ШІ — частка гэтага. Адбываецца і „прарэджванне шэрагаў“, але відавочна наспявае нешта большае», — сказаў ён.

У каментарыі Business Insider Фарыд удакладніў, што сёння лепшыя працоўныя месцы для выпускнікоў-інфарматыкаў зусім не ў звычайных кампаніях ў Крамянёвай даліне.

«Я заўсёды лічыў, што самыя захапляльныя прымяненні інфарматыкі не ў Facebook, Google ці Amazon, а на яе стыку з іншымі галінамі: вылічальнае адкрыццё лекаў, медыцынская візуалізацыя, вылічальная нейранавука, вылічальныя фінансы, лічбавыя гуманітарныя навукі, уключаючы мастацтва і музыку, вылічальная сацыялогія, палітыка і гэтак далей. Дыплом па інфарматыцы — гэта больш, чым проста ўменне пісаць код», — сцвярджае ён.

Фарыд і вядучы падкаста, астрафізік Хакім Алусэйі, абмяркоўвалі, як сын Алусэйі, які вывучае інфарматыку на апошнім курсе, не можа знайсці працу. Фарыд адзначыў, што бачыць тую ж праблему ў Берклі, а гэта — адзін з лепшых універсітэтаў для вывучэння камп’ютарных навук.

«Нашы студэнты раней атрымлівалі па пяць прапаноў аб стажыроўцы за час вучобы. Пасля выпуску ім прапаноўвалі вельмі высокія зарплаты, мноства варыянтаў, яны маглі выбіраць, куды пайсці. Зараз яны цешацца, калі атрымліваюць адзін офер», — сказаў ён.

Дыскусія аб будучыні інфарматыкі ідзе па ўсім тэхналагічным сектары. Рост папулярнасці вайб-кодынгу і ўменне ШІ самастойна пісаць код толькі ўзмацнілі трывожныя настроі. Фарыд распавёў, што яго часта просяць даць параду студэнтам, і ў апошні час яго рэкамендацыі змяніліся: «Раней я казаў, што трэба атрымліваць шырокую адукацыю — ведаць фізіку, мову, гісторыю, філасофію, але потым па-сапраўднаму паглыбіцца ў адну вобласць, стаць вельмі добрым у адной справе. А цяпер я раю добра асвоіць шмат розных рэчаў, таму што мы не ведаем, што чакае нас наперадзе».

Як і многія спецыялісты ў сферы ШІ, Фарыд лічыць, што канкурэнтаздольнымі застануцца толькі тыя, хто навучыцца выкарыстоўваць новыя тэхналогіі. «Я не думаю, што ШІ пакіне юрыстаў без працы. Але юрысты, якія будуць выкарыстоўваць ШІ, выцесняць тых, хто не будзе гэтага рабіць. І тое ж самае датычыцца любой прафесіі», — сказаў ён.