Пракуратура накіравала ў суд справу супраць Цапкалы. Сярод абвінавачванняў — атрыманне хабару ў 150 тыс. еўра

Экс-кіраўніка ПВТ абвінавачваюць паводле некалькіх артыкулаў крымінальнага кодэкса, у тым ліку ў атрыманні хабару. Нібыта ён атрымаў больш за 150 тысяч еўра за выбар пэўнай кампаніі ў якасці генпадрадчыка для будаўніцтва аб’екта. Паводле даных пракуратуры, грошы былі пералічаныя на разліковы рахунак падкантрольнай Цапкалу кампаніі, размешчанай на Кіпры.

Іншыя артыкулы, паводле якіх Цапкалу выставілі абвінавачванне:

• злоўжыванне службовымі паўнамоцтвамі, што пацягнула прычыненне шкоды ў буйным памеры; 
• заведама лжывы данос пра здзяйсненне злачынства;
• публічныя заклікі да захопу ўлады, акту тэрарызму, іншых дзеянняў, накіраваных на прычыненне шкоды нацыянальнай бяспецы Беларусі;
• стварэнне экстрэмісцкага фармавання і кіраванне ім;
• фінансаванне экстрэмісцкай дзейнасці;
• паклёп і публічная абраза прэзідэнта Беларусі;
• дыскрэдытацыя Беларусі.

Паводле даных пракуратуры, у дачыненні да Валерыя Цапкалы ладзіцца спецыяльная вытворчасць. Да абвінавачанага завочна прымененая мера стрымання ў выглядзе заключэння пад варту. Таксама Генпракуратура заявіла пазоў аб кампенсацыі маёмаснай шкоды на суму большую за 6 тысяч рублёў. У цяперашні час Валерый Цапкала знаходзіцца па-за межамі Беларусі.