Праверце, а раптам вы ўжо дармаед. Кароткі FAQ

«Дармаедскія» правілы абнаўляюцца ці не кожны месяц, і з кожным разам для беларусаў застаецца ўсё менш прасторы і часу для жыцця, не закранутага «дармаедскім» статусам.

Ад 1 красавіка спісы незанятых у эканоміцы складаюцца не раз на квартал, а штомесяц. Крыху раней набылі моц змены, стыгматызуючыя грамадзян, якія выехалі за мяжу. Вырашылі нагадаць вам асноўныя маячкі з улікам апошніх апдэйтаў.

Дысклэймер. Слова «дармаед» ніжэй мы ў думках бяром у двукоссе. 

Вы пенсіянер? Студэнт-вочнік у Беларусі/ЕАЭС? Афіцыйны беспрацоўны?

Калі так — віншуем, вы — НЕ дармаед. 

Вы маеце жытло?

Калі не — віншуем, статус дармаеда вам не пагражае. Хай галава баліць ва ўладальніка.

Вы маеце жытло/машынамесца і вы яго афіцыйна здаяце?

Вы плаціце падаходны падатак, значыць вы НЕ дармаед.

Вы працаўладкаваныя ў Беларусі, працуеце па ППД або як ІП?

Пакуль у казну ідуць падаткі, вы НЕ дармаед. 

Вы працаўладкаваныя па-за межамі Беларусі?

Гледзячы дзе. Калі ў іншых краінах ЕАЭС (Расія, Казахстан, Кыргызстан, Арменія), вы выратаваныя. Дашліце даведку з працы і/або працоўную дамову (можна па імэйле) у «дармаедскую» камісію, і на год (калі толькі кантракт не заканчваецца раней) вы вольныя ад кляйма і падвышанай камуналкі. 

У вас дамова ГПХ (падраду) у ЕАЭС і вы шляце ў камісію акты выкананых работ?

Для вас дрэнная навіна: акты больш не спатрэбяцца, колькі б грошай вы ні зарабілі ў «дружалюбных» краінах, вы ўсё роўна дармаед. Ад 1 лютага пасуе толькі працоўная дамова/кантракт. Прычым дасылаць дакументы ў камісію трэба не раз на год, а раз на квартал.

Вы сумленна працуеце па дамове ГПХ у Беларусі, але аплату атрымліваеце не штомесяц?

Складанае пытанне. Паспрабуйце паразумецца з «дармаедскай» камісіяй.

Вы працуеце па-за межамі ЕАЭС,

плаціце падаткі ў «недружалюбных» краінах і ў вас больш ніякіх «апраўданняў» перад роднай дзяржавай? Вам не пашанцавала, вы — дармаед. Падумайце, можа, усё ж такі здаць кватэру, пакуль гэта залічваецца за індульгенцыю?

У вас дзіця, маладзейшае за 7 гадоў / трое+ непаўналетніх дзяцей / дзіця-інвалід

і на гэтай падставе вы НЕ дармаед? Будзьце ўважлівыя пры выездзе за мяжу: як толькі ваша адсутнасць перавысіць 30 дзён за квартал, вас прызнаюць дармаедам. Выключэнне: вы выехалі на лячэнне. 

Вы даўно за мяжой, але не значыліся дармаедам дзякуючы дзецям?

Цяпер будзеце.

У вас дамок у вёсцы (патрэбная рэгістрацыя), вы карміліся са свайго агарода

і на гэтай падставе не лічыліся дармаедам? Глядзі абзац вышэй: 30-дзённая адсутнасць у краіне, і вы — у статусе. 

Выехалі з Беларусі праз Расію ў разліку на тое, што вас «не палічаць»?

Цяпер могуць палічыць. Прынамсі, МУС планавала яшчэ ад 1 лютага збіраць у расійскіх калег інфармацыю пра грамадзян РБ, якія выехалі/заехалі з/на тэрыторыі/ю РФ. Пра тых, хто стаіць у Расіі на міграцыйным уліку — таксама.

Вяжаце кручком і думаеце, што вас выратуе статус рамесніка

з падаткам 6,5 BYN на месяц? Хутчэй за ўсё, вас з гэтага саслоўя ўжо выключылі (пакінулі толькі тых, хто змог даказаць выканкаму, што займаецца спрадвечна нацыянальным рамяством) і прапанавалі перайсці на ППД.

Дык якія варыянты застаюцца ў тых, хто з’ехаў за мяжу і якія не жадае прадаваць нерухомасць? Іх няшмат:

— здача жытла/машынамесца;

— праца па працоўнай дамове/кантракце ў краінах ЕАЭС;

— праца з выплатай у Беларусі ППД;

Wanted. Калі мы не ўлічылі нейкіх варыянтаў/магчымасцяў/рызык, дапоўніце нас, напісаўшы ў бот @devby_insight_bot — гэта ананімна. Пішыце таксама свае гісторыі пра тое, як вы пазбавіліся статусу дармаеда ці, наадварот, не змаглі гэтага зрабіць насуперак намаганням.