Кампаніі ПВТ рэзка павялічылі найм замежнікаў у 2024 — у асноўным расіян

Паводле дадзеных Дэпартамента па грамадзянстве і міграцыі МУС, за мінулы год кампаніі ПВТ узялі на працу 539 замежных спецыялістаў. Гэта ўдвая больш, чым у 2023 годзе. Звяртае на сябе ўвагу і яшчэ адзін факт: упершыню за апошнія пяць гадоў колькасць замежнікаў, якія працаўладкаваліся ў Парк, не скарацілася, а вырасла.

У асноўным гэта адбылося за кошт расійскіх кампаній, якія адкрылі (і працягваюць адкрываць) юрыдычныя асобы ў РБ і сталі рэзідэнтамі ПВТ, а таксама за кошт расійскіх спецыялістаў.

У спісе вядомых расійскіх ІТ-бізнесаў, якія далучыліся да ПВТ за апошні 1+ год, ёсць:

• Расійскі холдынг VK («ВК Решения»). Кампанія ў Беларусі развівае блог-платформу «Дзэн», сацыяльную сетку «ВКонтакте» і бізнес-платформу «VK Tech».
• «Ланіт» — адзін з найбуйнейшых ІТ-холдынгаў у Расіі. Ён займаецца распрацоўкай ПЗ, дыстрыбуцыяй прадуктаў і рашэнняў для тэлекамаў, пастаўкамі лічбавай тэхнікі. Холдынг трапіў пад санкцыі Мінфіна ЗША з-за падтрымкі вайскова-прамысловага сектара Расіі.
• Цэнтр распрацоўкі расійскай Yadro (уваходзіць у «ІКС Холдынг»), якая стварае вылічальныя платформы, сістэмы апрацоўкі і захоўвання дадзеных, тэлекамунікацыйнае і сеткавае абсталяванне, персанальныя і «разумныя» прылады.
• «Цифра брокер» супрацоўнічае з беларускай крыптабіржай IMEX Global. З канца мінулага года кампанія пачала гандляваць крыптавалютамі і прадастаўляць такія паслугі фізічным і юрыдычным асобам.

Паводле дадзеных МУС, за мінулы год у ПВТ працаўладкавалася больш за 350 расійскіх спецыялістаў — амаль у тры разы больш, чым у 2023 годзе. З агульнай колькасці замежнікаў, узятых на працу, расіяне склалі 65,5%.

У топ-3 таксама ўвайшлі ўкраінцы (кампаніі ПВТ узялі на працу 35 чалавек) і кітайцы (28 чалавек).

На дадзены момант больш за 35% рэзідэнтаў ПВТ — гэта кампаніі з замежным капіталам. Усяго ў Парку працуе каля 60 тыс. спецыялістаў. З 2022 года агульная колькасць супрацоўнікаў у кампаніях ПВТ скарацілася прыкладна на 30%.