ПВТ чакае перазагрузка, а Беларусь — крыптабанкі

Янчэўскі нагадаў, што ў 2017 годзе ў краіне быў прыняты дэкрэт № 8, які ў тым ліку датычыўся крыптавалюты, і што Беларусь першай у свеце пачала на заканадаўчым узроўні рэгуляваць гэтую сферу. «Мы сапраўды былі піянерамі. Зразумела, што за гэты час вельмі шмат у свеце змянілася. І яно змянялася, змяняецца і будзе змяняцца. Прычым тэмп паскарэнняў, хуткасць пастаянна ўзрастаюць», — патлумачыў ён неабходнасць трансфармацыі.

Янчэўскі назваў галоўным прыярытэтам абарону інтарэсаў кожнага грамадзяніна: «Каб ні адзін махляр, ні адна нейкая незразумелая левая структура не магла залезці ў кішэню беларусу, абрабаваць яго, абакрасці і падмануць». Дадаў, што гэта важна для галіны ў цэлым і для фарміравання іміджу ПВТ і Беларусі ў замежных інвестараў.

Па яго словах, пры ўкараненні навацый трэба абапірацца на сусветны досвед і старацца апярэдзіць яго, каб усе іншыя краіны бралі з нас прыклад. Ён адзначыў, што пад кіраўніцтвам Лукашэнкі ПВТ ужо перажыў некалькі этапаў і цяпер зноў «атрымае вельмі магутнае і цікавае развіццё».

Пасля той жа нарады ў Лукашэнкі першы намеснік старшыні праўлення Нацбанка Аляксандр Ягораў паведаміў, што ў Беларусі з’явяцца крыптабанкі. Іх дзейнасць будзе рэгулявацца ўказам палітыка, «каб патэнцыяльныя інвестары, прыходзячы сюды, выразна разумелі правілы гульні».