EPAM перавёз усіх, каго планаваў? Выдаткі на рэлакейт у 2023 рэзка ўпалі

Рэлакейт

Праз вайну ва Украіне кампанія была вымушаная рэлакаваць у іншыя краіны частку ўкраінскай каманды.

Таксама ў рэлакацыйную праграму трапілі супрацоўнікі расійскага і беларускага офісаў. З Расіі кампанія вырашыла сысці, а на працы беларускага офіса EPAM у 2022 годзе адбілася таксічнасць лакацыі — нежаданне асобных заказчыкаў працаваць з айцішнікамі ў Беларусі.  

Усяго за першае паўгоддзе 2022 на рэлакейт EPAM выдаткаваў 33 мільёны долараў. Але ўжо сёлета выдаткі на рэлакацыю скараціліся да мінімуму. За шэсць месяцаў — менш за 0,5 мільёна долараў.

Дапамога Украіне

У сакавіку 2022 года EPAM запусціў праграму гуманітарнай дапамогі для сваіх супрацоўнікаў і іх сем’яў на 100 мільёнаў долараў. За мінулы год на гэтыя мэты кампанія выдаткавала каля 45 мільёнаў долараў.

Сёлета за шэсць месяцаў было выдаткавана каля 10 мільёнаў долараў. 

Ва Украіне знаходзіцца самы буйны рэгіянальны офіс EPAM. На канец мінулага года там працавала 10,5 тысяч вытворчых спецыялістаў. Таксама ва Украіне размешчаны самыя буйныя актывы кампаніі. На канец першага квартала гэтага года яны ацэньваліся ў 70 мільёнаў долараў. 

Сыход з Расіі

У гэтым годзе ў справаздачах EPAM больш няма даных аб выдатках, звязаных з сыходам з РФ.

Летась EPAM быў вымушаны панесці выдаткі праз сыход з расійскага рынку. Яны таксама ўвайшлі ў агульныя выдаткі праз вайну ва Украіне. 

Агулам праз сыход з Расіі выдаткі кампаніі за мінулы год склалі каля 37 мільёнаў долараў:

• больш за 17 мільёнаў долараў — выдаткі, звязаныя з рэструктурызацыяй бізнэсу і звальненнем супрацоўнікаў;
• амаль 20 мільёнаў долараў — страты ад абясцэньвання актываў у Расіі і спынення магчымасці выкарыстоўваць актывы. 

EPAM наўпрост і праз аднайменную кіпрскую «дачку» валодаў у Расіі некалькімі арганізацыямі: ТАА «ЭПАМ Рашэнні», ТАА «Коўдвэб» і ТАА «ЭПАМ Сістэмз».

Першыя дзве кампаніі цяпер ліквідуюцца. А сёння стала вядома, што кампанія «ЭПАМ Сістэмз» была прададзеная расійскай групе «Рэксофт». Гэта распрацоўшчык праграмнага забеспячэння і інфармацыйных сістэм для тэлекаму, банкаў, ІТ, медыя, гасцінічнага бізнэсу, турызму. Галаўны офіс размешчаны ў Маскве, дадатковыя — у Санкт-Пецярбургу і Стакгольме, цэнтры распрацоўкі — у Варонежы і Растове-на-Доне.

Паводле даных на пачатак жніўня мінулага года 20% кампаніі належала «Інтэррос капітал». Яна ўваходзіць у структуру прыватнай інвестыцыйнай кампаніі «Інтэррос», якой валодае расійскі алігарх Уладзімір Патанін.

У паведамленні EPAM Systems гаворыцца, што продаж расійскага бізнэсу быў скончаны 26 ліпеня. EPAM плануе ў трэцім квартале адлюстраваць страту ад продажу ў памеры каля 18,4 мільёна долараў, уключаючы прызнанне назапашанай страты ад курсавых розніц, якая адносіцца да даччынай кампаніі, што ў цяперашні час уключаная ў склад іншай сукупнай страты.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.