«Чаму? Праз грошы». Айцішнік сышоў з падпрацоўкі ў таксі праз новыя законы, але перадумаў і вярнуўся
Як новыя правілы аўтамабільных перавозак змянілі рынак на прыкладзе гісторыі аднаго айцішніка-таксіста.
Што здарылася
Ад 1 лістапада ў поўную сілу запрацаваў рэестр аўтамабільных перавозак пасажыраў у нерэгулярных зносінах. Таксісты, не ўключаныя ў рэестр, цяпер па-за законам. Многія свядома вырашылі сысці з рынку, бо не пагадзіліся з патрабаваннямі — праходзіць павышэнне кваліфікацыі, наляпляць маркіроўку, усталёўваць плафон і відэарэгістратар у салоне, укладаць працоўную дамову з наймальнікам. У выніку колькасць кіроўцаў скарацілася, цэны і час чакання выраслі.
Мінтранс дае справаздачу, што рэестр поўніцца, аднак толькі 62% кіроўцаў і 63% транспартных сродкаў уключаны ў спіс.
Вось колькі ўдзельнікаў, паводле звестак Мінтранса, было ў рэестры на 4 лістапада 2024 года:
- 245 дыспетчараў (у тым ліку 156 дыспетчараў таксі);
- 4,6 тысячы перавозчыкаў, або 86% ад агульнай колькасці (у тым ліку больш за 3,1 тысячы перавозчыкаў аўтамабілямі-таксі);
- 26 тысяч кіроўцаў (62%), уключаючы 13,9 тысячы кіроўцаў аўтамабіляў-таксі;
- 22,4 тысячы транспартных сродкаў (63%), у тым ліку больш за 12,4 тысячы аўтамабіляў-таксі.
«Адвалілася каля 65% кіроўцаў»
Ад 1 лістапада карыстальнікі Яндэкса бачаць у сваіх праграмах, што «кіроўцаў на лініі менш за звычайнае» і адпаведна тарыфы вышэйшыя, чым зазвычай. Пасажырам не падабаецца, а як самім таксістам?
Вось гісторыя айцішніка, які сышоў з таксі 1 лістапада, але ўжо вяртаецца.
— Я працую Junior Java Developer у адной вядомай кампаніі, але праз маленькую зп у вольны час таксую.
Да 1 лістапада я арандаваў машыну ў адным з аўтапаркаў, партнёраў Яндэкса, аддаваў парку 50% свайго заробку за машыну, а ўсе выдаткі па абслугоўванні, запраўцы і мыйцы аўто ён браў на сябе. За змену ўдавалася зарабіць ад 110 да 200 BYN.
Наогул падпрацоўка ў таксі асаблівага задавальнення мне не прыносіць, а з набліжэннем рэестра з яго патрабаваннямі я вырашыў, што не хачу з гэтым звязвацца. Калі раней афармленне таксістам займала 15 хвілін, то цяпер на гэта трэба выдаткаваць час і грошы.
Не толькі атрымаць картку таксіста (ад 40 да 60 BYN), але і прайсці курсы павышэння кваліфікацыі, калі стаж кіроўцы больш за 5 гадоў, а гэта адымае яшчэ 400-450 BYN і два тыдні жыцця. Асабіста мне павышаць кваліфікацыю пакуль не трэба, у мяне стаж меншы, але перспектыва такая мне ўсё роўна не спадабалася. Тыя ж кіроўцы, якія таксуюць на сваіх машынах, акрамя іншага, павінны абляпіць аўто і абсталяваць яго таксометрам і рэгістратарам.
Непрывабным гэты бізнэс здаўся і многім іншым таксістам: у нашым парку адвалілася каля 65% кіроўцаў. Зрэшты, нельга сказаць, што яны засталіся ні з чым — для большасці таксі было падпрацоўкай.
Я планаваў, што 1 лістапада вярнуся да заробкаў у інтэрнэце: раней я распрацоўваў сайты праз замежную біржу. Але неўзабаве я вырашыў пачакаць з распрацоўкай.
Чаму? Праз грошы. Пакуль я быў у войску, мой акаўнт праз санкцыі заблакавалі, а на мясцовых пляцоўках заказаў няшмат. Затое я ўбачыў заробкі таксістаў ад 1 лістапада. Тарыфы выраслі на 40-60%. За вылікам камісій парку і іншых выдаткаў калегі па цэху ў першыя дні лістапада зараблялі па 100 долараў за 12-гадзінную змену. Узважыўшы ўсе «за» і «супраць», я прыняў рашэнне вярнуцца.
Для гэтага давялося выдаткаваць 60 BYN на картку таксіста (курсы павышэння, паўтаруся, мне пакуль не патрэбныя) і ўкласці са сваім паркам працоўную дамову. Калі раней мы працавалі па дамове ГПХ, то цяпер яна называецца працоўнай.
Не, ніякіх акладаў, прэмій і адпачынкаў у гэтай працоўнай дамове не прапісана: кіроўцы самі выбіраюць, калі ім выходзіць на лінію, адпаведна свой «адпачынак» яны рэгулююць самастойна. Акладаў і прэмій таксама няма — што зарабіў, то і атрымаў. Умовы такія ж, як і былі.
Заўтра — першы выезд на лінію пасля ўключэння ў рэестр.
Не ведаю, колькі яшчэ прапрацую ў таксі. Мая зп у ІТ-кампаніі цяпер у раёне 550 долараў, але перспектывы велізарныя. Адчуванне адсутнасці вопыту з кожным месяцам мяне паволі пакідае, а гэта значыць, што неўзабаве варта падумаць пра змену працадаўцы або пра перагляд зп.
Читать на dev.by