Распрацоўшчык Pokemon Go звальняе чвэрць штату

Таксама кампанія закрые свой офіс у Лос-Анджэлесе і згорне распрацоўку дзвюх гульняў: NBA All-World, якая выйшла ў студзені, і Marvel: World Of Heroes, якая рыхтавалася. Звальненні пройдуць па ўсёй кампаніі і закрануць 230 чалавек, уключаючы гульнявое падраздзяленне.

Pokemon Go выйшла ў 2016 годзе і імгненна стала папулярнай. Тады яна паставіла рэкорд запамповак за тыдзень у App Store. Кампанія адзначыла, што сёння стала вельмі складана запускаць і прасоўваць новыя гульні праз іх мноства, а таксама праз змяненні ў правілах стораў і на рэкламным рынку. Niantic вырашыла засяродзіцца на падтрымцы і павелічэнні аўдыторыі свайго хіта.

Гэта ўжо другі раўнд звальненняў для Niantic: падчас першага ў чэрвені 2022 года за бортам засталося прыкладна 8% яе супрацоўнікаў. Тады ж кампанія абвясціла пра закрыццё чатырох праектаў.

У маі з’явілася інфармацыя пра падзенне выручкі Niantic ад Pokemon Go. Тады прадстаўнік кампаніі зняпраўдзіў чуткі і дадаў, што ў параўнанні з аналагічным перыядам 2022 года яе даходы выраслі.