Распрацоўшчыкі Tor паказалі новы хуткі браўзер з VPN

Новы браўзер Mullvad бясплатны і даступны для працы ў Windows, Mac і Linux. Распрацоўшчыкі сцвярджаюць, што браўзер не збірае ніякіх даных пра карыстальніка. Таксама ў Mullvad Browser па змаўчанні ўключаны прыватны рэжым, то-бок файлы cookie, кэш і гісторыя наведвання сайтаў не захоўваюцца паміж сеансамі.

У адрозненне ад Tor, Mullvad працуе на тэхналогіі не цыбульнай маршрутызацыі, а VPN. Распрацоўшчыкі адзначылі, што стандартны браўзер Tor не заўсёды зручны, бо проста павольна працуе. Таксама большасць карыстальнікаў Tor не адчуваюць неабходнасці ў празмернай абароне браўзера. Для такіх карыстальнікаў быў распрацаваны Mullvad.