Рэгулятары ЕС падтрымалі закон аб рэгуляванні АІ

Згодна з дакументам, усе АІ-сістэмы падзеляць на тры катэгорыі: з непрымальнымі рызыкамі, высокімі і нізкімі. Першыя будуць забароненыя, другія мусяць адпавядаць пэўным патрабаванням, трэція не будуць рэгулявацца. Непрымальныя рызыкі — у тым ліку тыя, калі АІ выкарыстоўваюць для маніпуляцый і выстаўлення «сацыяльнага рэйтынгу».

Законапраект апісвае правілы выкарыстання такіх сістэм, у тым ліку сістэм распазнавання твараў, генератыўных нейрасетак, беспілотных аўтамабіляў ды іншых. Кампаніі-распрацоўшчыкі будуць абавязаныя ацэньваць іх патэнцыйныя рызыкі з пункту гледжання «здароўя, бяспекі, фундаментальных правоў, навакольнага асяроддзя, дэмакратыі і вяршэнства закона».

Дакумент забараняе выкарыстанне сістэмы распазнавання твараў пры дапамозе біяметрыі ды іншых сістэм «аддаленай біяметрычнай ідэнтыфікацыі» ў рэжыме рэальнага часу ў грамадскіх месцах. Таксама законапраект забараняе распазнаванне эмоцый паліцыяй, працадаўцамі і ў навучальных установах.

Спіс абмежаванняў распаўсюджваецца на выкарыстанне АІ для катэгарызацыі: паводле полу, расы, этнічнай прыналежнасці, грамадзянства, веравызнання і палітычнай пазіцыі. Таксама ў дакуменце забаронены збор з камер і з сацсетак біяметрычных даных, якія плануецца выкарыстоўваць для базы распазнання твараў.

Таксама плануецца забараніць паліцыі выкарыстоўваць прэдыктыўную аналітыку для прагназавання правапарушэнняў. Законапраект не забараняе выкарыстання генератыўнага АІ (у тым ліку чат-ботаў), аднак яны таксама мусяць адпавядаць патрабаванням празрыстасці. Кантэнт трэба пазначаць спецыяльнай шыльдачкай, а стваральнікі мусяць публікаваць спіс таго, якая абароненая аўтарскім правам інфармацыя выкарыстоўвалася для навучання.