Рэкрутынгавы стартап дапамагае айцішнікам знайсці працу за адзін дзень

Кандыдаты праходзяць адбор, які ўключае гутарку з ШІ-інтэрв’юерам, які ўмее разбіраць тэхнічныя праекты і «валодае бясконцым цярпеннем». «Вы можаце гаварыць 15 хвілін запар, і ён не перапыніць», — тлумачыць сузаснавальнік і генеральны дырэктар Fonzi Ян Моў.

На аснове сабранай інфармацыі Fonzi запрашае інжынераў на Match Day — дзень, калі кампаніі напрамую знаёмяцца з кандыдатамі. Працадаўцы абавязаны загадзя паказваць мінімальны ўзровень заробку, каб выключыць непрыемныя сюрпрызы пасля доўгіх сумоўяў.

Па словах Моў, традыцыйны рэкрутынг «зламаўся для абодвух бакоў». Кампаніі атрымліваюць тысячы водгукаў за суткі, а кандыдаты марнуюць месяцы, паўтараючы адно і тое ж на інтэрв’ю. Fonzi імкнецца пазбегнуць гэтай неэфектыўнасці. «Яны [працадаўцы] не будуць цягнуць працэс тры месяцы», — адзначае заснавальнік.

Напрыклад, для софтвернага інжынера Фрэнка Бардэлі ўдзел у Fonzi стаў шанцам пазбегнуць зацягнутага пошуку. З 14 кампаній на яго Match Day адразу тры запрасілі яго на інтэрв’ю. У выніку ён уладкаваўся на новую працу ўсяго за некалькі тыдняў. «Я быў рады атрымаць хоць адно супадзенне, а атрымаў адразу некалькі», — распавёў ён.

Стартап бясплатны для саіскальнікаў і зарабляе за кошт камісіі ў 18% ад базавай зарплаты нанятага кандыдата. Пакуль праекту ўсяго тры месяцы, але кампанія ўжо плануе пашыраць геаграфію: акрамя Нью-Ёрка і аддаленых пазіцый у ЗША восенню сэрвіс запрацуе і для Сан-Францыска.