Reuters: абмежаванні праглядаў у Twitter нашкодзяць вяртанню рэкламадаўцаў

Раней Ілан Маск абвясціў пра ўвядзенне ў сацсетцы сутачнага ліміту на колькасць даступных для чытання твітаў. Бізнэсовец патлумачыў змяненне правілаў перашкодай «экстрэмальнаму ўзроўню» збору даных і маніпулявання сістэмай. Мноства карыстальнікаў былі незадаволеныя абмежаваннямі і выкладвалі скрыншоты з перавышэннем ліміту паведамленняў.

Рэкламныя аналітыкі, апытаныя Reuters, лічаць, што гэты крок шкодзіць працы Якарына, якая прыступіла да абавязкаў гендырэктара мінулага месяца і спрабуе наладзіць адносіны з рэкламадаўцамі, якія пакінулі сэрвіс пасля куплі кампаніі Маскам. Галоўны аналітык Insider Intelligence Жасмін Энберг лічыць, што абмежаванне колькасці праглядаў можа стаць катастрофай для рэкламнага бізнэсу.