Расійскую «дачку» Google западозрылі ў наўмысным банкруцтве

Кіраўнік даследаваў дзейнасць кампаніі ад сакавіка 2019 да снежня 2022 года. Ён выявіў істотнае зніжэнне ліквіднасці ТАА «Гугл» ад снежня 2020 года. Паводле яго ацэнкі, на гэты час аб’ём запазычанасці кампаніі па выплаце дывідэндаў перад заснавальнікамі склаў 10 млн RUB ($103 тысячы).

У той жа час запазычанасць па разліках мацярынскай Google Ireland Limited вырасла больш як да 2 млрд RUB ($20,6 млн). Таляроўскі ахарактарызаваў узровень плацежаздольнасці даўжніка як «той, які паступова зніжаецца», што можа быць абумоўлена штрафамі супраць кампаніі ў Расіі і значным падзеннем выручкі, пачынаючы з 3 квартала 2022 года.

Акрамя гэтага, «дачка» Google ажыццяўляла спісанні кошту пазаабаротных і абаротных актываў, «матываваўшы рашэнне тым, што існуе нявызначанасць у бесперапыннасці дзеянняў», высветліў кіраўнік. «Выснова: выяўленыя прыкметы, якія сведчаць аб наяўнасці наўмыснага банкруцтва», — гаворыцца ў паведамленні за подпісам Таляроўскага. У той жа час аб’ектыўных прыкмет фіктыўнага банкруцтва няма, але «маюцца фармальныя прыкметы фіктыўнага банкруцтва».

У маі мінулага года расійская «дачка» Google звярнулася ў суд для прызнання яе банкрутам, быў прызначаны часовы кіраўнік. Кампанія заявіла, што арышт банкаўскага рахунку зрабіў немагчымай працу яе офіса, у тым ліку захаванне супрацоўнікаў і выплату заробкаў, аплату пастаўшчыкам і падрадчыкам, выкананне іншых фінансавых забавязанняў. Працэдуру банкруцтва ў дачыненні да ТАА «Гугл» суд увёў пры канцы мінулага лістапада.

Маёмасць і актывы ТАА «Гугл» былі арыштаваныя паводле пазоваў ад шэрагу расійскіх тэлеканалаў. У прыватнасці, на пачатку чэрвеня 2022 года арбітражны суд наклаў арышт на агульную суму 1 млрд RUB у якасці забеспячальнай меры па двух пазовах ВГТРК, таксама былі задаволеныя пазовы кампаній «ГПМ Забаўляльнае тэлебачанне» і НТВ, тэлеканалаў «360», «Звезда» і АНА «ТБ-Навіны», заснавальніка тэлеканала RT (кожны на суму 500 млн RUB).

Падставай для пазоваў стала блакаванне каналаў гэтых СМІ на YouTube. Таксама суд прызначыў Google абаротны штраф на суму большую за 7,2 млрд RUB за невыдаленне забароненага ў Расіі кантэнту. Прыставы вырашылі спагнаць яго прымусова.

Згодна з матэрыяламі першага сходу крэдытораў ТАА «Гугл», які адбыўся 22 жніўня, аб’ём грашовых забавязанняў кампаніі перад крэдыторамі і ўпаўнаважанымі органамі складае каля 20, 1 млрд RUB ($207 млн).