У Расіі пры канцы года пачнуць тэсціраваць «суверэнны інтэрнэт» з бяспечнымі рэсурсамі і ўваходам праз персанальны ідэнтыфікатар

Сетка мае стаць «абсалютна празрыстай», без магчымасці ўваходу з ананімных прылад, рэгістрацыя і атрыманне персанальнага ідэнтыфікатара будуць ажыццяўляцца па пашпарце, а зайсці ў абаронены сегмент можна будзе з любога пункта свету. Доступ да «неабароненага» інтэрнэту таксама захаваецца, але адказнасць за ўсе рызыкі будуць несці самі карыстальнікі.

У Дзярждуме лічаць, што асаблівы сегмент дапаможа абараніць персанальныя даныя карыстальнікаў, абараніць іх ад спаму, махляроў і фішынгу, а тэхналогіі будуць абароненыя ад «закладак» у софце і жалезе. Пры гэтым укараненне тэхналогіі будзе няхуткім. Аднак яна запатэнтаваная, а пры канцы года пачнуцца выпрабаванні распрацоўшчыкамі. Ідэя «закрытых» сетак не новая — напрыклад, у Расіі ўжо існуе нямала карпаратыўных сетак, трапіць у якія можна толькі з захаваннем шэрагу ўмоў, а інфармацыя абаронена ад чужых карыстальнікаў. Падобныя праекты рэалізуюцца і ў іншых краінах, напрыклад, у Кітаі.

Ідэю «чыстага» Сеціва ўпершыню агучылі прадстаўнікі Лігі бяспечнага інтэрнэту яшчэ ў 2013 годзе. Яны прапанавалі ўвесці сістэму фільтрацыі з магчымасцю яе адключэння з асабістай заявы паўналетняга абанента. У МТС, «Білайне» і «Мегафоне» выступілі супраць, паколькі ініцыятыва запатрабавала б ад усіх аператараў усталявання дарагіх апаратна-праграмных комплексаў і выдаткаў на абслугоўванне. Неаднаразова прапаноўвалася і сістэма фільтрацыі рэсурсаў для дзяцей — «белы інтэрнэт» для школьнікаў з правераным змесцівам рэсурсаў, у тым ліку з фільмамі, літаратурай ды іншымі культурнымі каштоўнасцямі. Пры канцы 2022 года паведамлялася, што стварэнне бяспечнага інтэрнэту для дзяцей працягваецца.

Эксперты адзначаюць, што інфраструктура для «суверэннага інтэрнэту» ў Расіі ўжо існуе, і ў сетках аператараў сувязі ўжо ўсталяваныя тэхнічныя сродкі процідзеяння пагрозам (ТСПП), дзякуючы чаму Раскамнагляд здольны сам блакаваць любыя сайты без запыту да аператараў. Акрамя таго, апошнія рэалізуюць уласныя метады абароны ад незаконнага кантэнту.

На думку некаторых экспертаў, ТСПП дазваляюць у тэорыі цалкам адключыць Расію ад глабальнай сеткі, хоць з пункту гледжання тэхналогій і ІТ-галіны «гэта будзе катастрофа». Усё будзе залежаць ад геапалітычнай сітуацыі. Зрэшты, эксперты падкрэсліваюць, што пакуль не вельмі ясна, якім чынам можна будзе рэгістраваць грамадзян у сетцы па пашпарце. Эфектыўнасць рэгістрацыі па нумарах тэлефонаў пад пытаннем, паколькі нават цяпер, паводле некаторых даных, у краіне ёсць каля 7 млн «шэрых» SIM-карт. Некаторыя эксперты лічаць, што ў Расіі ўжо цяпер ёсць усе неабходныя рашэнні і іх неабходна проста пісьменна выкарыстоўваць.