Ryanair абвясціла распродаж квіткоў «для вялікіх ідыётаў» — «спецыяльна для Ілана»

У рамках акцыі найбуйнейшы еўрапейскі лоўкостар прадае 100 тысяч білетаў па €17 на рэйсы ў адзін бок у Базель, Бірмінгем і Кёльн.

«Купляйце проста зараз, пакуль Маск не набыў сабе квіток!!!» — напісала кампанія ў X і пазначыла Маска.

Канфлікт разгарэўся на мінулым тыдні. Усё пачалося з каментара Майкла О’Лiры — нязменнага кіраўніка Ryanair з 1994 года. У інтэрв’ю Reuters ён заявіў, што не збіраецца ўсталёўваць на самалёты Starlink — спадарожнікавы інтэрнэт ад SpaceX, якую заснаваў і ўзначальвае найбагацейшы чалавек планеты.

У інтэрв’ю ірландскай радыёстанцыі Newstalk О’Лiры патлумачыў, што абсталяванне патрабуе ўстаноўкі антэны, якая пагаршае аэрадынаміку самалёта. Кажа, гэта дадало б авіякампаніі да $250 млн выдаткаў на паліва. У выніку пасажырам давялося б плаціць за квіток прыкладна на €1 больш — а кліенты лоўкостара, паводле яго словаў, не імкнуцца аплачваць такія «паляпшэнні».

Маск адрэагаваў у сваім стылі — запусціў у X апытанне, ці не купіць яму Ryanair. Пост сабраў амаль 950 тысяч галасоў, і больш за 75% удзельнікаў выказаліся «за». Маск таксама паабяцаў «вярнуць Райана на законны трон» — назва Ryanair паходзіць ад прозвішча аднаго з яе заснавальнікаў, Тоні Райана.

Х разразіўся мемамі.

Сёння О’Лiры валодае пакетам акцый Ryanair на суму больш за €1 млрд, але вядомы ён перш за ўсё сваім рэзкім і правакацыйным стылем. Гэта падаграе слоўную дуэль паміж двума мільярдэрамі.

Маск заявіў, што О’Лiры памыліўся ў разліках па паліўных выдатках з-за ўстаноўкі тэрміналаў Starlink. О’Лiры ў адказ у эфіры ірландскага радыё заявіў: «Вельмі багаты, але ўсё роўна ідыёт», — і дадаў, што Маск «абсалютна нічога не разумее» ва ўпраўленні авіякампаніямі.

Пасля гэтага Маск назваў О’Лiры «канчаным ідыётам», заклікаў звольніць яго і зноў загаварыў пра куплю Ryanair.

Паралельна працягнулі тролінг сацсеткі авіякампаніі. Калі ў X адбыўся масавы збой, акаўнт Ryanair напісаў: «Магчыма, табе патрэбен Wi-Fi, @elonmusk?» А ў панядзелак кампанія пажартавала, што бартавы інтэрнэт — гэта «прапаганда, на якую мы не вядземся».

У адказ Маск напісаў: «Колькі будзе каштаваць купіць вас?» — і неўзабаве запусціў тое самае апытанне.

Маск любіць ладзіць апытанні ў X для абмеркавання сваіх бізнес-рашэнняў. У 2021 годзе ён пытаўся, ці варта прадаць 10% акцый Tesla, а ў 2022-м рэгулярна ладзіў галасаванні пра Twitter — ад захавання свабоды слова да кнопкі рэдагавання. Гэта вылілася ў куплю платформы за $44 млрд, якую ён перайменаваў у X.

Рынкавая капіталізацыя Ryanair цяпер складае каля $36 млрд — дробязь у параўнанні з маёнткам Маска, які ацэньваецца прыкладна ў $680 млрд. Ён і раней жартаваў пра куплю авіякампаніі і прызначэнне кіраўніком чалавека з імем «Райан».

Але на практыцы такая ўгода амаль немагчымая, адзначае Business Insider. Ірландыя ўваходзіць у ЕС, а еўрапейскія правілы патрабуюць, каб авіякампаніі знаходзіліся пад кантролем грамадзян або дзяржаў ЕС. Авіяцыя — адна з самых жорстка рэгуляваных галін. У ЗША, напрыклад, замежнікам наогул нельга валодаць больш чым 25% авіякампаніі. «У правілах валодання авіякампаніямі Маск разумее яшчэ менш, чым пра аэрадынаміку самалётаў», — падсумаваў учора О’Лiры.

«Срэзалі мышцы, а не тлушч». Больш за 26 тысяч амерыканскіх дзяржслужачых, звольненых супрацоўнікамі Маска, нанялі назад

Па тэме

«Срэзалі мышцы, а не тлушч». Больш за 26 тысяч амерыканскіх дзяржслужачых, звольненых супрацоўнікамі Маска, нанялі назад

«Маск — гэта бульдозер»: кіраўнік Microsoft AI ацаніў лідараў ШІ-індустрыі

Па тэме

«Маск — гэта бульдозер»: кіраўнік Microsoft AI ацаніў лідараў ШІ-індустрыі