«Самая няўдалая віза для іміграцыі». Ці хвалююцца айцішнікі з-за новага ўказа Трампа?

Дональд Трамп падпісаў указ аб рэформе праграмы H-1B, якая дазваляе амерыканскім кампаніям наймаць высокакваліфікаваных замежных спецыялістаў. Ён будзе прымяняцца толькі да новых заявак, але кампаніям прыйдзецца плаціць за кожнага заяўніка па 100 тысяч даляраў на год на працягу шасці гадоў. Да гэтага часу сукупныя зборы за H-1B не перавышалі $1500.

Паводле версіі Белага дома, рэформа H-1B накіравана супраць «злоўжыванняў» і абараняе амерыканскіх працаўнікоў ад выцяснення з рынку. Эксперты крытыкуюць рэформу, заяўляючы, што гэты ўказ нашкодзіць тэхналагічным кампаніям і канкурэнтаздольнасці ЗША.

У той жа час не ўся ІТ-супольнасць драматызуе забаронны тарыф. У дыскусіях на нізавым узроўні часта гучыць меркаванне, што H-1B не вельмі карысная для іміграцыі ў ЗША, таму яе абмежаванне не катастрофа.

«Візы талентаў — выдатныя альтэрнатывы»

«Амерыканскія стартапы ніколі па H-1B і не рэлакавалі. Стартапы наймаюць аддалена ў краінах, дзе заробкі невысокія, і на гэтым развіваюцца. А H-1B у цэлым самая няўдалая віза для пераезду з усіх умоўна працоўных», — так запярэчыла рэкрутар беларускага паходжання на алармісцкі пост калегі-маркетолага пад назвай «Рэлакацыя ў Амерыку скончана».

Маўляў, для большасці кампаній 100K за візу — гэта занадта дорага, візы будуць выдавацца ў выключных выпадках, іміграцыйныя дзверы ў Амерыку фактычна зачыніліся. Так куды паедуць тыя, хто не трапіў у ЗША?

Пад постам — вялікая дыскусія. У тэзіса пра тое, што H-B1 не шлях для іміграцыі, шмат лайкаў+падтрымліваючыя каментары. Удзельнікі супольнасці згаджаюцца, што «H-1B — гэта фактычна сучаснае рабства» і што для іміграцыі лепш падыходзіць О-1, яна ж «віза талентаў», або «віза Эйнштэйна». Хаця ўвогуле і яна не адносіцца да ліку іміграцыйных, аднак дае большую гнуткасць у дачыненнях з працадаўцамі.

• «O1-B і EB-1 — візы талентаў, выдатныя альтэрнатывы. У тым ліку можна адкрыць сваё LLC. Жыць і працаваць», — паўтарае тэзіс пра «сучаснае рабства» іншы каментатар.
• «Перапосцілі навіну з дэмакратычных СМІ. А тое, што ў гэтай візы гадавая квота 65000, якую на 95% выбіралі Індыя, Кітай і іншая Паўднёва-Усходняя Азія, забыліся паказаць, — злуецца трэці ўдзельнік супольнасці. — Прычым выбіралі бодзішопы, якія потым проста перапрадаюць людзей, так што там таксама латарэя: праходзілі 400 тысяч заявак на 65 тысяч віз. І гэтая віза гадоў 10 як перастала працаваць для звычайных распрацоўшчыкаў, а звычайныя кампаніі і стартапы перасталі яе афармляць — каму трэба чакаць супрацоўніка год, ды яшчэ і ў латарэі ўдзельнічаць?».
• «50% віз Н-1В сыходзіла ў Індыю на кампаніі тыпу Інфасіс ці Тата, якія робяць аўтсорсінг. Доля рэальных талентаў у Амазоне ці Майкрасофце па Н-1В вельмі маленькая. Да таго ж у выпадку неабходнасці яны робяць запрашэнні па L-1, па якіх няма латарэй і іншых праблем. Для стартапераў ёсць іншыя магчымасці тыпу О-1, ЕВ-1 або іншыя лазейкі. У цэлым, я лічу правільнае рашэнне», — яшчэ адзін карыстальнік LinkedIn наўпрост падтрымлівае Трампа.

«Хочаце пераехаць па візе талентаў? Пажадана паскорыцца»

Мы спыталі двух айцішнікаў-беларусаў, якія проста зараз рыхтуюцца да пераезду ў Штаты, што яны думаюць пра гэты ўказ Трампа і ці не змяняе ён іх планы. Аказалася, што ўказ нічога не змяняе, аднак агульны антыміграцыйны трэнд выклікае трывогу і прымушае паскорыцца.

— Падтрымліваю, — нечакана стаў на бок Трампа дасведчаны інжынер родам з Беларусі, які працуе над атрыманнем візы талентаў EB-1. — Цяперашняе рашэнне — вынік злоўжыванняў неімміграцыйнымі візамі, да ліку якіх адносіцца H-B1. Іх атрымліваюць, каб застацца ў ЗША, нягледзячы на тое, што тэрмін працы па гэтых візах не ідзе ў залік іміграцыйных працэсаў. Ёсць іміграцыйныя візы, іх ніхто не адмяняў.

Яшчэ адзін беларус, які зараз робіць другую спробу атрымаць іміграцыйную візу і з’ехаць у ЗША (першая не ўдалася), лічыць, што ўказ Трампа быў цалкам чаканы і што ён дадае трывогі. Зрэшты, працоўная віза ўсё роўна не была для яго варыянтам.

— Чаму я не разглядаю працоўную візу? Таму што мая спецыялізацыя (я не распрацоўшчык) не запатрабавана на амерыканскім рынку настолькі, каб за маю рэлакацыю плаціла нейкая кампанія. Гэты шлях больш падыходзіць для распрацоўшчыкаў або моцных менеджараў. А вось пад візу талентаў EB-1 мае навыкі і досвед падыходзяць, бо я сумяшчаю некалькі роляў, уласна тэхнічныя і адукацыйную.

Планы на пераезд у Амерыку апошнія навіны не ўплываюць, але прымушаюць паскорыцца. Таму што — хто ведае — у наступны раз могуць узмацніцца правілы для атрымання візы талентаў. Памятаеце, вясной хадзілі чуткі, што грамадзянам Беларусі могуць забараніць уезд па іміграцыйных і турыстычных візах? Яны не пацвердзіліся, але, пакуль Трамп ва ўладзе, усякае можа здарыцца.

Вось і ў мяне была адна адмова, і мы з адвакатам нават не зразумелі чаму: падстаў было дастаткова, і ўсе доказы нібыта былі ў парадку. Проста віза талентаў — гэта заўсёды суперсуб’ектыўная гісторыя: твой лёс, па сутнасці, вырашае афіцэр, які чытае твой кейс.

Знаходзячыся ў ЗША, уплываць на гэты працэс як быццам крыху лягчэй, таму многія едуць у ЗША па турыстычнай візе або па неіміграцыйнай «візе талентаў» O-1, якая патрабуе працадаўцу, і там ужо змяняюць свой статус.

Зразумела, што далей будзе толькі горш, таму тым, хто ўпэўнены ў сваім намеры пераехаць і атрымаць іміграцыйны статус, трэба рабіць гэта ўжо зараз.