Алеся Чапкевич world 16 чэрвеня 2026, 15:44

SpaceX купляе канкурэнта Anthropic і OpenAI за $60 млрд, каб ратаваць свой аддзел ШІ

Усяго праз некалькі дзён пасля рэкорднага выхаду на біржу SpaceX абвясціла пра паглынанне стартапу Cursor, які распрацоўвае ШІ-асістэнта для напісання кода. Сума ўгоды склала $60 млрд акцыямі, закрыць яе плануюць у трэцім квартале сёлета, піша TechCrunch.

Пакінуць каментарый

SpaceX купляе канкурэнта Anthropic і OpenAI за $60 млрд, каб ратаваць свой аддзел ШІ

Усяго праз некалькі дзён пасля рэкорднага выхаду на біржу SpaceX абвясціла пра паглынанне стартапу Cursor, які распрацоўвае ШІ-асістэнта для напісання кода. Сума ўгоды склала $60 млрд акцыямі, закрыць яе плануюць у трэцім квартале сёлета, піша TechCrunch.

Купля павінна выратаваць ШІ-падраздзяленне SpaceX, якое сфармавалі на базе xAI пасля іх зліцця раней сёлета. ШІ-накірунак Маска цяпер знаходзіцца ў глыбокім крызісе і рэструктурызацыі: да канца сакавіка xAI пакінулі ўсе 11 сузаснавальнікаў, а чат-бот Grok пастаянна генераваў скандальнае — ад саманазвы «Меха-Гітлер» да парнаграфічных дыпфейкаў з жанчынамі і дзецьмі, праз што SpaceX цяпер загразнула ў судовых ісках.

Пры гэтым менавіта на ШІ будавалася ўся прэзентацыя SpaceX для інвестараў перад IPO. Кампанія заяўляла, што прэтэндуе на рынак аб’ёмам $28 трлн, дзе $26 трлн прыпадае менавіта на штучны інтэлект (у тым запуск спадарожнікаў для ШІ-вылічэнняў і карпаратыўны софт). Каб выканаць гэтыя абяцанні і дагнаць канкурэнтаў, Ілану Маску тэрмінова спатрэбіліся тэхналогіі Cursor.

Стартап быў заснаваны ў 2022 годзе (тады ён называўся Anysphere). Ён рос касмічнымі тэмпамі на хвалі буму вайб-кодынгу і стаў галоўным супернікам Anthropic і OpenAI на рынку ШІ-агентаў. Да ўгоды са SpaceX стартап паспеў прыцягнуць мільярды долараў інвестыцый, у тым ліку прайшоўшы праз акселератар OpenAI.

Літаральна перад паглынаннем Cursor рыхтаваўся закрыць чарговы раунд фінансавання на $2 млрд ад Andreessen Horowitz, Thrive і Nvidia пры ацэнцы ў $50 млрд. Але, паводле дадзеных інсайдэраў, нават гэтых грошай стартапу не хапала, каб проста выйсці ў нуль, таму прапанова Маска аказалася вельмі своечасовай.

Умовы пакупкі абмяркоўваліся яшчэ ў красавіку: SpaceX тады зафіксавала абавязацельства альбо выкупіць Cursor за $60 млрд, альбо выплаціць $10 млрд неустойкі ў выпадку зрыву. Пасля пятнічнага IPO паглынанне стала для Маска чыста тэхнічным пытаннем. Акцыі SpaceX узляцелі са стартавых $135 да болей чым $200 на прэмаркеце ў аўторак, павялічыўшы капіталізацыю кампаніі амаль на $1 трлн усяго за пару дзён — гэта прыкладна 16 такіх стартапаў, як Cursor.