Сакрэтная ўгода дазволіла Spotify не плаціць камісіі ў Google Play

Паводле ўмоў угоды, Spotify не плаціць камісіі за падпіскі, аформленыя праз уласную плацежную сістэму, і толькі 4% пры выкарыстанні плацежнай сістэмы Google. Стандартны памер камісіі ў Google Play складае 15%. Акрамя таго, бакі дамовіліся ўкласці па $50 мільёнаў у «фонд поспеху» для падтрымкі сумесных ініцыятыў і праектаў.

Віцэ-прэзідэнт Google па глабальных партнёрствах і карпаратыўным развіцці Дон Харысан патлумачыў у судзе, што гэтае рашэнне тлумачыцца беспрэцэдэнтнай папулярнасцю Spotify. Наяўнасць сэрвісу ў Google Play і іншых ключавых паслугах Android крытычная для прывабнасці смартфонаў для пакупнікоў.

Google не называе імёнаў іншых распрацоўшчыкаў, якія дамагліся ад кампаніі выгаднейшых тарыфаў. Аднак стала вядома, што кампанія прапаноўвала зніжаную камісію ў памеры 10% Netflix. Стрымінгавы сэрвіс адмовіўся ад прапановы, цяпер Netflix спыніў прапаноўваць опцыю пакупкі ў сваёй праграме для Android, каб не быць абавязаным выплачваць Google будзь-якія зборы.

Google хваравіта ставіцца да разгалашэння ўмоў канфідэнцыйных пагадненняў з партнёрамі. Кампанія асцерагаецца, што раскрыццё інфармацыі можа паўплываць на перамовы з іншымі распрацоўшчыкамі, якія могуць запатрабаваць аналагічных ільготных умоў. Раней кампаніі прыйшлося прызнаць наяўнасць такога пагаднення з Apple па дэфолтнай пошукавай сістэме Google у браўзеры Safari.