Сям'я Трампа паказала фірмовы «залаты» смартфон. Дзе вырабляюць гаджэт — незразумела

Trump Mobile пачне працу з тарыфнага плана «The 47 Plan» вартасцю $47,45 у месяц — адсылка да парадкавага нумара Трампа як 47-га прэзідэнта ЗША. Тарыф уключае бязлімітныя званкі, паведамленні і інтэрнэт, а таксама дадатковыя паслугі: тэлемедыцыну, міжнародныя званкі ў больш чым 100 краін і дапамогу на дарогах. Сетка будзе функцыянаваць як віртуальны аператар (MVNO), выкарыстоўваючы інфраструктуру Verizon, AT&T і T-Mobile.

Адначасова Trump Mobile прэзентавала смартфон T1 — прыладу з 6,8-цалевым AMOLED-дысплеем, частатой абнаўлення 120 Гц, 12 ГБ аператыўнай памяці, 256 ГБ убудаванай памяці і акумулятарам на 5000 мАч. Камера ўключае асноўны модуль на 50 Мп і два сенсары па 2 Мп. Смартфон будзе працаваць на Android 15 і каштаваць $499. Прылада даступная для перадзамовы з дэпазітам $100, а пастаўкі запланаваны на жнівень гэтага года.

У прэс-рэлізе сцвярджаецца, што тэлефон «распрацаваны і выраблены ў ЗША», аднак канкрэтных вытворцаў кампанія не ўказвае. Эксперты выказваюць сумнеў у рэалістычнасці гэтай заявы: у ЗША практычна адсутнічае інфраструктура для вытворчасці смартфонаў у гэтай цэнавай катэгорыі.

Па юрыдычных дакументах, праект рэалізуецца праз кампанію T1 Mobile LLC, зарэгістраваную ў Флорыдзе. Trump Mobile выкарыстоўвае брэнд «Trump» на ўмовах абмежаванай ліцэнзіі, і, згодна з заявай на афіцыйным сайце, Trump Organization не займаецца ні распрацоўкай, ні вытворчасцю, ні продажам прылад або сувязі.

Прэзідэнцкая сям’я раней не раз рабіла камерцыйныя спробы выкарыстоўваць сваё імя — ад Trump Steaks да Trump University — многія з якіх скончыліся правалам. Тым не менш, па дадзеных фінансавай справаздачнасці, толькі ў 2024 годзе Дональд Трамп атрымаў больш за $600 мільёнаў ад ліцэнзійных пагадненняў, крыптапраектаў і іншых крыніц даходу.