Усё вырашае ўдача. Колькі каштуе дабрацца з Мінска да Варшавы пасля закрыцця мяжы

Заканчэнне ваенных вучэнняў, як і намякаў польскі бок, не пацягнула за сабой адкрыццё мяжы. Аўтобусныя перавозчыкі працягнулі адмену рэйсаў у Польшчу да 25 верасня, аднак і гэтая дата нічога не абяцае. Тым часам, тыя, каму вельмі трэба, працягваюць шукаць магчымасць выехаць у ЕС і вярнуцца. Паглядзелі, колькі каштуюць зараз варыянты, што засталіся.

Аўтобус+аўтобус ці аўтобус. Ад 84 еўра

Нягледзячы на абвешчаную адмену ўсіх-усіх рэйсаў да 25 сакавіка, на анлайн-сэрвісах па-ранейшаму можна знайсці асобныя актыўныя рэйсы Мінск-Варшава на бліжэйшыя дні. Напрыклад, у продажы ёсць квіткі на 19 верасня адпраўленнем 15.20 у Intercars і Atlasbus (Infobus сумленна выдае нуль рэйсаў па 25 верасня ўключна), з 23 верасня да іх дадаюцца квіткі на 7.00 у Intercars.

Цэны — 267 — 504 BYN. Але захапляцца не трэба: як тлумачыць сэрвіс, такія рэйсы скасоўваюцца у дзень ад’езду.

Відавочным рашэннем здаецца даехаць з Мінска да Вільні і там перасесці на аўтобус Вільня — Варшава. Вось толькі ўсё распрададзена, рэдкія квіткі з’яўляюцца ў канцы верасня. Каштуюць ад 270 BYN да 825 BYN. На рэйсы з 1 кастрычніка квіткоў больш і яны танней — ад 250 BYN. Паехаць з Вільні ў Мінск значна прасцей: квіткі ёсць хоць на заўтра. Ад 220 BYN.

З Вільні ў Варшаву шмат аўтобусаў, квіткі — ад 24 да 47 еўра. Гэта значыць, калі пашанцуе і схопіце ўмоўна танны, за 75 еўра, квіток да Вільні (а памятаеце часы, калі ён каштаваў 11 еўра?), дарогу да Варшавы можна ўкласці ў 100 еўра. Магчымую начоўку ў Вільне не ўлічваем.

Некаторыя перавозчыкі прапануюць рэйсы проста да Польшчы праз Літву і нават Латвію. У Ecolines гэта ўсё стыковачныя варыянты з перасадкай у Вільне ці Марыямпале за 468 BYN.

А вось BayerTrans прапануе небанальны маршрут праз Латвію. За 17 гадзін і 300 BYN (гэта значыць 84 еўра) абяцае давезці да Варшавы Заходняй. Пры гэтым ніякай Рыгі па шляху (а яна і не па шляху зусім) не будзе. Маршрут — скразны да Варшавы, ад Латвіі — толькі пагранпераход.

Пасажыраў папярэджваюць, для праходжання мяжы яны павінны зарэгістравацца на eta.gov.lv не пазней 48 гадзін да ўезду ў Латвію.

Сістэма паказвае 3 вольных месца на аўтобус Варшава — Мінск 27 верасня, які таксама ідзе праз Латвію. Поўны маршрут — Познань — Гомель, перавозчык — BS ЧТУП «Траса Е 95», цана — 418 BYN.

Цягнік + аўтобус. Ад 137 еўра

Даўно ацэнены беларусамі маршрут «цягнік да Калінінграда + аўтобус у Польшчу» у гэтыя дні яшчэ больш запатрабаваны. Галоўнае не адчайвацца, калі rw.by паказвае, што квіткоў на адрэзку «Мінск — Калінінград» няма — яны з’яўляюцца за пару дзён да патрэбнай даты.

Месца ў плацкарце каштуе 282 — 367 BYN, у купэ — 502 — 684 BYN. Аўтобус Калінінград — Варшава — ад 250 злотых. Калі купіць самы танны квіток на цягнік, то ўся дарога абыдзецца ў 137 еўра.

Даражэй і даўжэй, чым раскупленым аўтобусам праз Латвію, затое паўшляху вы ляжыце на паліцы і п’еце гарбату.

Самалёт + аўтобус. Ад 140 еўра

Маршрут такі ж, толькі замест шкла і падшклянкаў (дарэчы, яны яшчэ існуюць?) — папяровыя шклянкі «Белавія». Калі Польшча толькі абвясціла аб сваім намеры, квіткі на самалёт Мінск — Калінінград можна было купіць танней 300 BYN. Потым яны падаражэлі, але не ў разы. Кошты ўвесь час змяняюцца, таму трэба адсочваць.

Напрыклад, квіток на 19 верасня напярэдадні можна ўзяць за 293 BYN (без багажу). А гэта ж столькі ж, колькі самы танны цягнік.

Затое на суботу 20 верасня палёт у 2,5 разы даражэй. А на наступны дзень зноў цярпіма.

Увогуле, калі пашанцуе, дабрацца гэтым шляхам да Варшавы можна за 140 еўра. Ну, або значна даражэй, калі выберыце дарагі квіток. Суцяшэннем няхай служыць тое, што ў высокія тарыфы ўжо ўключаны багаж.

Зразумела, што з Калінінграда яшчэ прасцей і танней дабрацца да Гданьска. Але гэта ўжо неістотныя дэталі, калі вы перасеклі польскую мяжу.

Вы ў Еўропе на аўто? 5 (не) варыянтаў вярнуцца пасля закрыцця польскай мяжы

Па тэме

Вы ў Еўропе на аўто? 5 (не) варыянтаў вярнуцца пасля закрыцця польскай мяжы