Вы ў Еўропе на аўто? 5 (не) варыянтаў вярнуцца пасля закрыцця польскай мяжы

Часовае закрыццё пагранпераходаў на польска-беларускай мяжы ўсё больш набывае рысы пастаяннага. І бліжэйшыя дні напэўна адкрыюць мноства звязаных з гэтым праблем, якія проста не былі відавочныя ў першыя суткі дрэнных навін. Але ёсць і такія, што ляжаць больш-менш на паверхні.

Напрыклад, што будуць рабіць людзі, якія засталіся ў ЕС з тэрмінамі польскіх віз і ВНЖ, што сканчаюцца? Дапусцім, яны кінуцца ў Вільню і сядуць там на аўтобус да Мінска/Гродна/Ліды. Ці даедуць з Польшчы на аўтобусе да Калінінграда і там перасядуць на цягнік ці самалёт у Мінск. Ёсць і больш складаныя авіямаршруты — праз Грузію ці Турцыю.

Пасля таго як Літва і Латвія ўвялі забарону для легкавых машын на BY-нумарах, КПП «Брэст», па сутнасці, заставаўся адзінай магчымасцю для беларускіх турыстаў (а таксама для тых, хто жыве ў ЕС, але не змяніў рэгістрацыю аўто) уехаць у ЕС на сваім аўтамабілі. І выехаць.

А што цяпер? Калі зыходзіць з бягучай сітуацыі, шляхоў для прамога вяртання дадому праз беларускую мяжу ў такіх аўтамабілістаў не застаецца.

Нагадаем, у Літву на BY-нумарах адкрыты шлях толькі дыпламатам, уладальнікам літоўскіх віз і ВНЖ (яшчэ грамадзянам ЕС, якія жывуць у Беларусі). Права ўезду ў Літву ёсць таксама ў тых машын на беларускіх нумарах, у якіх перавозяць чалавечыя парэшткі (дрэнны сцэнар, адкідваем). У астатніх выпадках для праезду патрабуецца дазвол Міністэрства эканомікі і інавацый Літвы. Сумнеўна, што яно будзе масава выдаваць іх беларусам, якія засталіся пад Тэрэспалем.

Такім чынам, якія ёсць альтэрнатыўныя шляхі вяртання дадому на аўто? Мы паглядзелі на карту і ўбачылі такія (не) варыянты.

1. З Польшчы ў Калінінградскую вобласць, а далей да Санкт-Пецярбурга/Усць-Лугі на пароме?

На першы погляд, варыянт працоўны. Ёсць сайт агента ТАА «ІмэксСэрвіс», ёсць сайт перавозчыка «Трансбізнесконсалтынг», дзе гаворыцца, што яны аказваюць «паслугі па перавозцы транспарту і пасажыраў». Час у шляху складае 36-40 гадзін для лініі Балтыйск — Усць-Луга і 56-60 гадзін на напрамку Балтыйск — Санкт-Пецярбург. Ёсць актуальны расклад паромаў, але пры спробе забраніраваць рэйс нічога не выходзіць — даступных дат для браніравання няма.

Пры гэтым у тг-канале «Паром-Калінінград» знаходзім інфармацыю ад 14 ліпеня аб тым, што «грузапасажырскі паром АНТЭЙ не карыстаецца папулярнасцю ў турыстаў» і што з чэрвеня па сярэдзіну жніўня паром не працаваў.

«Прычынай паўзы паромнага паведамлення да сярэдзіны жніўня сталі нізкая пасажырская загрузка і эканамічная немэтазгоднасць перавозак. Падарожжа на пароме займае трое сутак, а кошт каюты перавышае цану авіябілета. Асноўнымі пасажырамі „Антэя“ аказаліся не адпачывальнікі, а дальнабойшчыкі», — гаворыцца ў паведамленні.

Калі вам удасца атрымаць выразную інфармацыю аб працы парома, дзяліцеся з намі.

2. З Гданьска/Гдыні ў Швецыю, а далей — у Фінляндыю і РФ?

З Любека (порт Травемюндэ) у Хельсінкі і далей — у РФ?

Не атрымаецца. Пагранпераходы на фінска-расійскай мяжы зачыненыя.

Мы хацелі было прапанаваць з Хельсінкі на пароме перабрацца ў Талін (эстонска-расійская мяжа пакуль адкрытая), але ўспомнілі, што ў Эстонію на машынах з беларускімі нумарамі таксама нельга.

Што ж рабіць? Прыйдзецца ехаць на поўдзень.

3. Балгарыя — Турцыя — Грузія — РФ — Беларусь.

Дэ-юрэ (калі візы хопіць), здаецца, нішто не перашкаджае турысту на беларускім аўто спусціцца да Чорнага мора і аб’ехаць яго па колу. З Варшавы да Мінска гэта ўсяго 5900 км, ці 70 гадзін бесперапыннай язды. Па шляху, кажа гугл, будзе шмат месцаў для фатаграфавання.

4. Паром Варна-Батумі. Далей сваім ходам праз Грузію і РФ.

Чорнае мора можна не аб’язджаць, а перасекчы на пароме Варна — Батумі. Кампанія «Укрферры» прапануе паромную пераправу па дастаўцы грузаў і транспартных сродкаў на пароме «Вільня» (такі гэта шанц абыйсці забарону і трапіць у «Літву»). Час у шляху — 62 гадзіны. Сістэма анлайн-браніравання працуе. Для легкавога аўто і двух пасажыраў у стандартнай каюце перавозка абыдзецца ў 51424 грыўні, ці крыху больш за 1000 еўра. Зразумела, што гэта толькі частка выдаткаў на дарогу.

5. Пераслаць машыну як груз?

ChatGPT падказвае, што забарона на ўезд у тую ж Літву дзейнічае толькі для беларускіх аўтамабіляў на хаду, але не распаўсюджваецца на грузаперавозкі. Калі аформіць машыну як груз і адправіць, дапусцім, з Германіі ў РФ, то яе прапусцяць праз тую ж Літву.

Калі шчыра, мы не вельмі разумеем, дакладна ці гэтая схема працоўная і якія там нюансы. Сумнеўна!

Калі вы ведаеце прычыны, па якіх гэтая опцыя немагчымая, пішыце ў каментарыях і у наш чат-бот.

Калі бачыце яшчэ варыянты, як аўтамабілісту вярнуцца ў Беларусь пасля 11 верасня, пішыце таксама.

Перад закрыццём польскай мяжы: якія чэргі, колькі каштуе падсесці ў аўто, што незразумела (не толькі калі адкрыюць)

Па тэме

Перад закрыццём польскай мяжы: якія чэргі, колькі каштуе падсесці ў аўто, што незразумела (не толькі калі адкрыюць)