СМІ: Activision не расказала супрацоўнікам пра ўцечку іх асабістых даных і патрабавала не гутарыць з прэсай

Паводле звестак інсайдара Тома Хендэрсана, хакеры атрымалі доступ да камп’ютара супрацоўніка аддзела персаналу Activision, у якім былі поўныя імёны супрацоўнікаў кампаніі, адрасы электроннай пошты, нумары тэлефонаў, даныя пра пасады, заробкі і г. д. Крыніца TechCrunch паведаміла, што кіраўніцтва так і не апавясціла працаўнікоў пра ўцечку даных. Супрацоўнікі даведаліся пра гэта з навін, ім забаранілі размаўляць пра гэта з прэсай. Аналітыкі адзначылі, што кэш выкрадзеных даных змяшчае падрабязную інфармацыю пра супрацоўнікаў студыі.

Activision заявіла публічна, што ў сеціва злілі толькі планы выдаўца па развіцці Call of Duty, а асабістыя даныя супрацоўнікаў і гульцоў не пацярпелі. «Пасля ўважлівага расследавання мы можам з упэўненасцю сказаць, што доступ да канфідэнцыйных даных супрацоўнікаў, гульнявога кода або даных гульцоў не ажыццяўляўся», — растлумачылі ў Activision. Скрыншоты, якімі падзяліліся даследчыкі, паказваюць, што хакеры атрымалі доступ да ўліковага запісу Slack супрацоўніка Activision і спрабавалі прымусіць іншых працаўнікоў пераходзіць па шкодных спасылках.