Падмяняе словы і робіць скрыншоты кожныя пяць хвілін: СМІ здабылі смартфон з Паўночнай Карэі

Рэдактар у смартфоне аўтаматычна падмяняў словы. Напрыклад, «Паўднёвая Карэя» станавілася «марыянетачнай дзяржавай». Калі ўвесці паўднёвакарэйскае слова, якое азначае «старэйшы брат» або «хлопец», тэлефон выпраўляе яго на слова «таварыш» і выводзіць папярэджанне, што першае слова можна выкарыстоўваць толькі для абазначэння роднага брата.

Таксама смартфон аўтаматычна робіць скрыншоты кожныя пяць хвілін і захоўвае іх у схаванай тэчцы, недаступнай для карыстальніка. Журналісты мяркуюць, што ўлады КНДР могуць праглядаць іх, каб кантраляваць актыўнасць карыстальніка.

Брэнд смартфона не ўказаны, але дызайн і інтэрфейс нагадваюць мадэлі Huawei або Honor з глыбокімі праграмнымі мадыфікацыямі. Ці здзяйсняюць гэтыя кампаніі афіцыйныя продажы ў КНДР, невядома, але калі так, то смартфоны, верагодна, працуюць выключна пад кіраваннем ухваленага ўрадам софту.

Пра выкарыстанне смартфонаў у Паўночнай Карэі можна даведацца толькі з чутак і сведчанняў тых, хто ўцёк з краіны. СМІ адзначаюць, што ў апошнія гады мабільных прылад там стала больш, разам з патрабаваннямі ўрада, якія прадугледжваюць забарону на іх падключэнне да глабальнага інтэрнэту і ўзмоцнены дзяржаўны нагляд. Таксама BBC піша, што ў КНДР дзейнічаюць так званыя «маладзёжныя атрады рэпрэсій», якія спыняюць маладых людзей на вуліцах, каб праверыць іх тэлефоны і перапіску.