Sony паказала PlayStation 5 Pro: усё пра новую кансоль

Вонкавых змяненняў амаль няма. Дызайн Pro-версіі нагадвае актуальную версію PS5 Slim: у яе падзеленыя бакавыя грані, але навінка не абсталяваная дыскаводам, які можна дакупіць асобна. У камплекце не будзе вертыкальнай падстаўкі. Яе таксама будуць прадаваць асобна.

Галоўныя змены — унутры. Кансоль атрымала васьміядзерны працэсар AMD Zen 2 з 16 патокамі і частатой 3,5 ГГц і максімальнай да 3,85 ГГц. Графічны працэсар пабудаваны на архітэктуры RDNA 3 і мае прадукцыйнасць 33,5 Тфлопс, што перавышае паказчыкі PS5 з RDNA 2 і 10,3 Флопс. Аперацыйная памяць засталася 16 Гбайт, хуткасць вырасла да 18 Гбіт/з (замест 14 Гбіт/з). Ёмістасць SSD вырасла ў 2 разы да 2 Тбайт.

Кансоль стала нашмат магутнейшай. Паводле слоў вядучага распрацоўшчыка Марка Чэрні, навінка пераўзыходзіць арыгінальную кансоль па некалькіх параметрах: буйнейшы графічны працэсар, удасканаленая трасіроўка прамянёў і наладжвальнае маштабаванне з дапамогай АІ.

• Мадэрнізаваны графічны працэсар. Графічны працэсар змяшчае на 67% больш вылічальных блокаў, а хуткасць абмену данымі ўзрасла на 28%. Хуткасць рэндэрынгу вырасла на 45% і мае палепшыць дэталізацыю і частату кадраў. У Pro-версіі цяпер не трэба ахвяраваць якасцю малюнка дзеля прадукцыйнасці.
• Advanced Ray Tracing. Павялічаная прадукцыйнасць дасць магчымасць павысіць хуткасць трасіроўкі прамянёў у два-тры разы больш, чым у бягучай кансолі. Яна забяспечыць дынамічнейшае адлюстраванне і праламленне святла.
• Маштабаванне на базе АІ. Гаджат атрымаў новую функцыю маштабавання на аснове штучнага інтэлекту Sony PlayStation Spectral Super Resolution (PSSR). Гэтая функцыя падобная да DLSS ад NVIDIA або FSR ад AMD. Яна павышае частату кадраў і якасць выявы і замяняе існую рэалізацыю часавага згладжвання або павышэння частоты дыскрэтызацыі.

Функцыя Game Boost аптымізуе больш чым 8500 гульняў, сумяшчальных з PS 4. Гэтая функцыя можа стабілізаваць або палепшыць прадукцыйнасць падтрымоўваных гульняў PS4 і PS5. Палепшаная якасць малюнка для гульняў PS4 таксама даступная для паляпшэння разрознасці ў некаторых гульнях PS4.

Pro падтрымлівае Wi-Fi 7. PS 5 Pro падтрымлівае бесправадное падключэнне па стандарце Wi-Fi 7, зменную частату абнаўлення (VRR) і разрознасць 8K. Для выкарыстання некаторых функцый трэба будзе выкарыстоўваць гульнявыя патчы, якія ўжо рыхтуюць распрацоўшчыкі існых на платформе гульняў. Яны будуць пазначаныя як гульні PS5 Pro Enhanced. Sony заявіла, што абнаўленні гульняў будуць бясплатнымі.

Падтрымку атрымаюць усе ключавыя эксклюзівы PS. Для геймераў ужо даступныя абноўленыя гульні Alan Wake 2, Assassin’s Creed: Shadows, Demon’s Souls, Dragon’s Dogma 2, Final Fantasy 7 Rebirth, Gran Turismo 7, Hogwarts Legacy, Horizon Forbidden West, Marvel’s Spider-Man 2, Ratchet & Clank: Rift Apart, The Crew Motorfest, The First Descendant і The Last Of Us Part II Remastered. Усяго да лістападаўскага рэлізу палепшаць ад 40 да 50 гульняў.

PS5 Pro будзе каштаваць 699$, або 799€. Кансоль паступіць у продаж 7 лістапада. На сайце PlayStation паведамляецца, што 26 верасня 2024 года папярэднія заказы будуць даступныя наўпрост ад PlayStation на direct.playstation.com. 10 кастрычніка 2024 года папярэднія заказы будуць даступныя для ўсіх астатніх кліентаў.