Сузаснавальнік Anthropic: пачалася эра менеджараў-гiкаў, што камандуюць арміямі ШІ-агентаў

Роля менеджараў трансфармуецца па меры таго, як штучны інтэлект змяняе працоўныя працэсы. Сузаснавальнік Anthropic Джэк Кларк прадказвае з’яўленне «менеджараў-гiкаў», якія будуць кіраваць сістэмамі ШІ-агентаў.

«Я думаю, што наступае эра менеджараў-гiкаў, калі ўменне кіраваць сістэмамі ШІ-агентаў і абслугоўваць іх зробіць людзей неверагодна магутнымі», — сказаў Кларк у падкасце «Conversations With Tyler». «Мы ўбачым з’яўленне менеджара-гiка, у якога ёсць свае „людзі“, але гэтыя „людзі“ — насамрэч асобнікі ШІ-агентаў, што выконваюць для іх велізарны аб’ём працы», — дадаў ён.

Кларк адзначыў стартапы, якія ўжо выкарыстоўваюць гэтую мадэль, працуючы з «вельмі малой колькасцю супрацоўнікаў у параўнанні з тым, што было раней, бо ў іх ёсць мноства агентаў кодынгу». Гэтая тэндэнцыя супадае з прагнозамі іншых лідараў індустрыі. Раней Марк Цукерберг адзначаў, што выкарыстанне ШІ дазваляе прадпрымальнікам «засяродзіцца на асноўнай ідэі» свайго бізнесу з «вельмі маленькімі, але таленавітымі камандамі».

Генеральны дырэктар Y Combinator Гары Тан падкрэсліў моц вайб-кодынгу. У сакавіку Тан заявіў, што гэты падыход дазваляе невялікім камандам стартапаў выконваць працу, эквівалентную 50–100 інжынерам. «Людзі дасягаюць гадавога даходу ад $1 да $10 мільёнаў з камандамі менш за 10 чалавек, і гэта сапраўды нешта новае для ранніх стадый венчурнага бізнесу», — сказаў ён. «Вы можаце проста размаўляць з вялікімі моўнымі мадэлямі, і яны ствараюць цэлыя аплікацыі».

Аднак эксперты папярэджваюць пра рызыкі празмернай залежнасці ад ШІ, уключаючы «галюцынацыі» вялікіх моўных мадэляў і складанасці з маштабаваннем або адладкай кода, створанага праз вайб-кодынг. Дырэктар па прадуктах Anthropic Майк Крыгер прадказаў, што ў бліжэйшыя тры гады праца распрацоўшчыкаў праграмнага забеспячэння зрушыцца з напісання кода на праверку кода, згенераванага ШІ.