Стваральнік ШІ-бота для тэхнічных сумоўяў назваў галоўную прычыну правалаў стартапаў

«Інжынеры проста не ўмеюць рабіць кантэнт», — сказаў Лі на канферэнцыі TechCrunch Disrupt 2025. Па яго словах, нават калі ў кампаніі ёсць добры прадукт, без моцнага дыстрыбуцыйнага падыходу яна асуджана: «Кожны стартап павінен думаць аб распаўсюджванні — інакш ніхто не даведаецца, што ты існуеш».

Cluely запусціўся ў пачатку года як інструмент, які дапамагае распрацоўшчыкам праходзіць тэхнічныя сумоўі, прапануючы адказы ў рэальным часе на экране карыстальніка. Пасля хвалі крытыкі кампанія прыбрала ўпамінанні аб «чыцінгу» і цяпер пазіцыянуе прадукт як «незаўважны» ШІ-асістэнт для прадуктыўнасці.

Праект атрымаў $15 мільёнаў інвестыцый ад Andreessen Horowitz і робіць стаўку на агрэсіўны маркетынг у сацсетках. Сам Лі адкрыта заяўляе, што ў Cluely ёсць толькі дзве пасады — інжынер і інфлюенсер: «Ты альбо ствараеш прадукт, альбо робіш яго вірусным. Ніхто не застаецца пасярэдзіне».

Па словах Лі, інтэрнэт больш не ўзнагароджвае «адпаліраваныя» брэнды — выйграюць «экстрэмальныя, сумленныя і асабістыя» заснавальнікі: «Рэпутацыя — гэта паняцце мінулага. Інтэрнэт узнагароджвае смелых, а не карпаратыўных».

Cluely стаў вядомы пасля віруснага відэа, дзе Лі спрабуе зрабіць уражанне на дзяўчыну на спатканні, выкарыстоўваючы ўласную аплікацыю. Гэты ролік прынёс стартапу мільёны праглядаў і зрабіў яго медыйным фенаменам. Лі сцвярджае, што не спрабуе правакаваць аўдыторыю наўмысна: «Я проста сумленны і аўтэнтычны. Магчыма, гэта проста частка маёй асобы».

Галоўная мэта Cluely — набраць мільярд праглядаў ва ўсіх сацсетках. «Кожная буйная кампанія вядома звычайным людзям. Мы таксама павінны быць такой», — сказаў Лі.

Па яго словах, традыцыйныя маркетолагі не здольны ствараць вірусны кантэнт, таму што не адчуваюць маладую культуру. Таму Cluely шукае неардынарных супрацоўнікаў і гатовы плаціць да $1 мільёна базавай зарплаты інжынерам і да $350 тысяч дызайнерам, не звяртаючы ўвагі на адукацыю, узрост ці грамадзянства. «Мне ўсё роўна, дзе ты вучыўся. Галоўнае — каб ты быў сусветнага ўзроўню», — напісаў Лі ў LinkedIn.