«Срэзалі мышцы, а не тлушч». Больш за 26 тысяч амерыканскіх дзяржслужачых, звольненых супрацоўнікамі Маска, нанялі назад

Першапачаткова DOGE абяцаў зэканоміць бюджэту трыльён даляраў, але фактычны вынік, паводле слоў самога ведамства, склаў $214 млрд. Эксперты лічаць, што гэтая лічба можа быць завышана адсоткаў на 40.

Даклад Элейн Камарк з Брукінгскага інстытута паказвае, што замест барацьбы з «паперамаральнікамі» DOGE звальняў інжынераў, дактароў і іншых высокакваліфікаваных прафесіяналаў, праца якіх крытычна важная для нацбяспекі і грамадскага здароўя.

Камарк налічыла 26 511 выпадкаў, калі з падачы DOGE звальнялі каштоўных дзяржслужбоўцаў, а потым наймалі назад. У палове кейсаў людзей аднаўлялі па рашэнні суда, але прыблізна ў чвэрці — па ініцыятыве саміх дзяржорганаў. Экспертка адзначае, што масавыя звальненні паставілі пад пагрозу іх здольнасць выконваць свае найважнейшыя функцыі.

Самым цяжкім наступствам дзеянняў DOGE стала масавая «уцечка мазгоў». Многія дасведчаныя дзяржслужбоўцы вырашылі звольніцца або выйсці на пенсію, не жадаючы чакаць, пакуль іх пасада будзе ліквідавана. Гэта прывяло да сур’ёзнага кадравага дэфіцыту. «Яны зрэзалі мышцы, а не тлушч», таму што «не разумелі, што робяць», заяўляе Камарк. За першыя паўгода пасля інаўгурацыі Трампа ў праграму адкладзенага звальнення запісаліся 154 тысячы дзяржслужбоўцаў, а больш за 70 тысяч сышлі ў адстаўку. Абодва паказчыкі значна — на дзясяткі тысяч — вышэй, чым у мінулыя гады.

Функцыі DOGE былі перададзены іншым ведамствам, напрыклад Упраўленню кадравай службы і Адміністрацыйна-бюджэтнаму ўпраўленню. Намаганні цяпер сканцэнтраваны на аднаўленні страчанага патэнцыялу. Папярэджаннем сталі звальненні ў Дэпартаменце энергетыкі, якому прыйшлося тэрмінова вяртаць інжынераў, адказных за ядзерны арсенал. Камарк адзначае, што ўраду цяпер давядзецца даказаць, што ён можа эфектыўна функцыянаваць, пакуль спрабуе кампенсаваць дэфіцыт кадраў.