ЗША спынілі латарэю грын-карт з-за страляніны ва ўніверсітэце

Пра гэта заявіла міністр унутранай бяспекі ЗША Крысці Ноэм, спаслаўшыся на тое, што падазраваны ў нападзе ўехаў у краіну менавіта па гэтай праграме.

Паводле словаў Ноэм, рашэнне прынята па прамым указанні прэзідэнта Дональда Трампа. Яна паведаміла, што Службе грамадзянства і іміграцыі ЗША (USCIS) даручана неадкладна прыпыніць дзеянне праграмы DV1. «Мы павінны гарантаваць, што ніводзін амерыканец больш не пацерпіць ад гэтай катастрафічнай праграмы», — напісала міністр у сацсетцы X.

Гаворка ідзе пра 48-гадовага грамадзяніна Партугаліі Клаўдыё Мануэля Невэша Валентэ. Ён падазраецца ў стральбе каля будынка Браўнаўскага ўніверсітэта 13 снежня, у выніку якой загінулі два студэнты і былі паранены не менш за восем чалавек.

Акрамя таго, следства звязвае яго з забойствам прафесара Масачусетскага тэхналагічнага інстытута, учыненым праз два дні. 18 снежня праваахоўныя органы паведамілі, што Валентэ быў знойдзены мёртвым у складскім памяшканні ў Нью-Гэмпшыры; па папярэдніх звестках, ён скончыў жыццё самагубствам. Матывы яго дзеянняў дагэтуль не ўсталяваны.

Згодна з дадзенымі паліцыі, Валентэ ўпершыню прыехаў у ЗША ў 2000 годзе па студэнцкай візе і вучыўся ў Браўнаўскім універсітэце. У 2017 годзе ён атрымаў іміграцыйную візу па праграме Diversity Visa, а затым — статус сталага жыхара ЗША.

Праграма Diversity Visa была створана Кангрэсам ЗША і штогод прадугледжвае выдачу да 50 тысяч грын-карт грамадзянам краін з нізкім узроўнем іміграцыі ў Злучаныя Штаты. У 2025 годзе на ўдзел у латарэі падалі заяўкі амаль 20 мільёнаў чалавек. Рашэнне аб яе прыпыненні, на думку экспертаў, амаль напэўна прывядзе да судовых пазоваў, паколькі праграма замацавана ў федэральным заканадаўстве.