Starlink будзе даступны ў транспарце, які рухаецца — усяго толькі трэба купіць талерку за $2500

Паводле даных кампаніі, цяпер спадарожнікавае абсталяванне можна ўсталёўваць на аўтамабілі, аднак карыстацца гэтай паслугай можна толькі падчас стаянкі. Для транспарту, які рухаецца, яна абыдзецца значна даражэй. «Стацыянарная» версія Starlink for RV каштуе $599, у руху спатрэбіцца талерка Flat High Performance, якая абыдзецца ў $2500. Таксама пры заказе трэба даплаціць $50 за дастаўку і ўсталяванне.

Абаненцкая плата застанецца той жа — $135 на месяц. Кампанія папярэдзіла, што абаненты «транспартнай» версіі сэрвісу маюць паніжаны прыярытэт у параўнанні з «хатнімі»: розніца ў хуткасці працы інтэрнэту можа быць прыкметнай у пікавыя гадзіны і ў раёнах з высокай шчыльнасцю падключэння. Стартаваў прыём папярэдніх заказаў. Пакрыццё сеткі застаецца абмежаваным нават у Паўночнай Амерыцы.