Стартап Shader, заснаваны беларускай, выпусціў AI-праграму. Яна генеруе AR-эфекты для сацсетак

Для стварэння крэатыву карыстальніку неабходна напісаць або вымавіць на англійскай мове тое, што ён хоча атрымаць ад нейрасеткі, напрыклад, «Merry Christmas». AI згенеруе калядны эфект, які адлюструецца на фота або відэа ў рэальным часе. Сам фільтр можна экспартаваць у іншыя сацсеткі. Адная з пераваг праграмы, паводле слоў распрацоўшчыкаў, — гэта здольнасць нейрасеткі генераваць эфекты адразу з некалькімі людзьмі ў кадры.

Акрамя запуску праграмы Shader сёння выйшаў на Product Hunt.

Заснавальніца Shader — экс-Head of Marketing беларускай кампаніі Wannaby Дар’я Сесіцкая. Таксама ў камандзе стартапа былыя супрацоўнікі кампаній Snapchat, Pinata Farms і Blizzard.

У жніўні гэтага года стартап прыцягнуў інвестыцыі ў памеры 580 тысяч долараў ад Betaworks, Greycroft, Differential Ventures, Mozilla Ventures і On Deck. Таксама Shader трапіў у вядомы нью-ёркскі акселератар AI Camp, куды праходзяць усяго 12 стартапаў на год.