Суд аштрафаваў юрыстаў на $5000 за фэйкавыя цытаты, згенераваныя ChatGPT

Федэральны акруговы суд Паўднёвай акругі Нью-Ёрка наклаў штраф на юрыдычную кампанію Levidow, Levidow & Oberman P.C. за тое, што двое юрыстаў кампаніі зрабілі для суда «заяву, якая ўводзіць у зман», з дапамогай атрыманых ад АІ фэйкавых цытат. Юрысты падалі «няісныя» юрыдычныя меркаванні з фэйкавымі цытатамі, створанымі АІ-інструментам, пасля гэтага працягнулі прытрымлівацца гэтых матэрыялаў, хаця суд засумняваўся ў іх рэальнасці.

Справа тычылася кліента адной авіякампаніі Раберта Мата, які заявіў, што быў траўмаваны падчас палёту з Сальвадора ў Нью-Ёрк. Адвакаты, якія яго прадстаўлялі, скарысталіся ChatGPT, каб знайсці прэцэдэнты, падобныя да гэтай справы. Чат-бот сфабрыкаваў прыклады, якія падалі суду як рэальныя. Суд не толькі наклаў штрафы, але абавязаў юрыстаў адправіць меркаванне суддзі і стэнаграму пасяджэння як кліенту, так і суддзям, якім прыпісваліся фэйкавыя цытаты.