Геймдэў-студыя Sad Cat з беларускімі каранямі прыцягнула $5 млн

Сузаснавальнікі Sad Cat Юрый Ждановіч і Ігар Грыцай адзначылі, што інвестыцыя дапаможа зрабіць Replaced цікавейшай гульнёй. «Мы зразумелі, што таго, што мы рабілі раней, было недастаткова. Таму мы пачалі шукаць партнёраў», — падзяліўся Грыцай. Тым не менш студыя імкнецца заставацца незалежнай дзякуючы Replaced і будучым гульням.

Цяпер студыя родам з Мінска займаецца анансаваным у 2021 годзе рэтрафутурыстычным экшэн-платформерам Replaced. У 2022-м яго рэліз быў перанесены праз пачатак вайны ва Украіне і вымушаную рэлакацыю каманды ў мэтах бяспекі. У гэтым верасні рэліз быў ссунуты яшчэ раз на 2024 год, але цяпер гэта звязана са складанасцю распрацоўкі.

«Гэта жахліва цяжка. Мы ўсталявалі сабе вельмі высокую планку якасці і візуальнага стылю», — адзначыў Грыцай. Ён дадаў, што ад гульні чакаюць многага, і каманда выкладваецца па поўнай. Тым не менш праз вялізны аб’ём працы выпусціць гульню сёлета выявілася немагчыма.

У GEM Capital заявілі, што ў Replaced ёсць усе шанцы «перавярнуць гульнявы ландшафт, завабіць аўдыторыю ўсяго свету і стаць пачаткам новай магутнай франшызы». Раней GEM інвеставала ў мінскую геймдэў-студыю Weappy і заснаваны беларусамі стартап Skich.