Сусветны лідар па чыпах згортваецца ў Мінску праз санкцыі. На рэлакейт супрацоўніка — да 35К

Да вайны ва Украіне ў мінскім офісе SK Hynix працавала больш за 200 чалавек. Колькасць каманды, якая цяпер знаходзіцца ў Беларусі, невядомая.

— Ад лета ў Польшчу рэлакаваліся каля 100 чалавек. Частка супрацоўнікаў сышла ў іншыя кампаніі, хаця цякучкі ў SK Hynix раней ніколі не было, бо ўмовы ў Беларусі па заробку былі вышэйшымі за рынак. Некаторыя стаміліся ад адсутнасці крутых праектаў. Праз санкцый з боку ЗША і Паўднёвай Карэі ў нас цалкам адсутнічала камунікацыя і доступ да рэсурсаў і сервераў, размешчаных у Мінску. Нават ліцэнзіі на розныя IDE і тулы нельга было набываць для мінскага офіса. Хтосьці сышоў праз нявызначанасць, — расказваюць супрацоўнікі.

Першапачаткова меркавалася, што астатнія спецыялісты будуць працаваць на ўнутраных праектах. Потым, паводле слоў суразмоўцаў, канцэпцыя змянілася. Кампанія паведаміла, што тых, хто адмовіцца рэлакавацца ў Польшчу без паважнай прычыны (нявырашаныя пытанні з ваенкаматам, хвароба, не далі візу і г. д), звольняць, альбо такім спецыялістам пагоршаць умовы — знізяць заробак, абавяжуць хадзіць у офіс. Рашэнне трэба было прыняць да канца лістапада.

— У 2023 годзе мінскі офіс збіраюцца закрыць. Пакуль ён працуе, але арэндныя плошчы скарацілі. У штаце ёсць інжынеры, што праўда, яны не працуюць над добрымі і свежымі праектамі. Засталася прыкладна палова каманды, новых спецыялістаў не наймаюць, — кажа суразмоўца.

Куды прапануюць пераязджаць і на якіх умовах?

Яшчэ ўвесну кампанія агучыла супрацоўнікам планы па рэлакацыі ў Гданьск і працаўладкаванні ў іншую кампанію — Solidigm. Гэта даччыная структура SK Hynix, якая была створаная ў выніку ўгоды з Intel.

Увосень 2020 года SK Hynix дамовілася пра куплю бізнэсу Intel па вытворчасці чыпаў памяці NAND. Сума ўгоды — 9 мільярдаў долараў. У студзені 2021 года завяршылася першая фаза продажу (заключны этап угоды пройдзе ў сакавіку 2025 года). Тады ж SK Hynix анансавала запуск даччынага падраздзялення Solidigm.

Сёлета ў верасні Solidigm адкрыла першы ў Польшчы аперацыйны цэнтр у Гданьску. Да канца гэтага года кампанія планавала адкрыццё ў Гданьску офіса ў Alpha Airport City.

Але, паводле слоў супрацоўнікаў, дакладныя тэрміны пакуль невядомыя.

— Абяцалі офіс ад новага года, але апошнім часам ніякай больш дакладнай інфармацыі на гэты конт не было. Была інфармацыя, што ў офісе не ўсім польскім спецыялістам хопіць месца, не кажучы ўжо пра рэлакантаў. Пакуль працуем аддалена. Працы значна дадалося, а супрацоўнікаў няма.

Ці будзе далей расці польскі офіс за кошт новых рэлакантаў з Беларусі, невядома. Многія спецыялісты SK Hynix адмовіліся пераязджаць у Польшчу ў тым ліку праз умовы рэлакацыі.

З нагоды рэлакейт-праграмы меркаванні супрацоўнікаў падзяліліся. 

«Датэрмінова звальняешся — вяртаеш выдаткі на рэлакейт»

Кошт рэлакацыі аднаго супрацоўніка ацэньваецца ў суму да 35 тысяч долараў (лічбу агучылі тры спікеры). Уваходзіць:

• 4 тысячы долараў — рэлакейт-бонус;
• 10 тысяч долараў — на перавозку рэчаў;
• кошт паслугі па пошуку пастаяннай кватэры (да 4 дзён працы рыэлтара);
• кошт арэнды часовага жытла да 60 дзён;
• дапамога ў падачы падатковай дэкларацыі за 2022 год.

— На рукі ты атрымліваеш 14 тысяч долараў (бонус+грошы на перавозку рэчаў). Астатнія паслугі выконваюць падрадчыкі. Кантралюе ўвесь працэс і аплачвае працу падрадчыкаў кампанія, спецыяльна нанятая SK Hynix.

Калі супрацоўнік адпрацаваў менш за два гады (730 дзён) і вырашыў звольніцца, то яму прыйдзецца пакрыць усе выдаткі на пераезд разам з падаткамі, якая кампанія заплаціць у працэсе рэлакацыі. Сума кампенсацыі будзе разлічвацца з улікам адпрацаванага часу. Чым больш дзён адпрацаваў, тым менш прыйдзецца вяртаць. Па факце адмовіцца ад паслугі па рэлакацыі няможна. У кантракце прапісана, што нас рэлакуе пэўная кампанія і пры датэрміновым звальненні менавіта ёй трэба будзе ўсё выплаціць.

(Адзін з суразмоўцаў сцвярджае, што ад бонусаў можна адмовіцца — заўв. dev.by).

«Нічога не згубіў»

— Кампанія дапамагла з візамі, афармленнем, падатковым суправаджэннем і пошукам жытла ў Польшчы. Прапанавала добры рэлакацыйны пакет. Заробак у сярэднім паднялі на 10-15% у параўнанні з мінскім. Што праўда, праз падаткі чыстымі на рукі выходзіць менш, але за кошт розных бонусаў гэтыя страты кампенсуюцца. Можна лічыць, што ў грошах нічога не страціў.

«Заробак стаў ніжэйшы»

— Польскі заробак нам разлічвалі, зыходзячы з беларускага заробку, павялічанага на 10 або 15% (у залежнасці ад пасады), і курса злотага да долара. Амаль усе пераязджалі ад жніўня да лістапада, тады курс злотага даходзіў да 5. Але па факце заробак разлічылі па менш выгаднаму курсе. З улікам высокіх падаткаў (32%) заробак у Польшчы ў параўнанні з Беларуссю паменшыўся. Кампанія паспрабавала гэта кампенсаваць за кошт sign in бонуса, але ён усё роўна не перакрывае падзення заробку.

Мы звярнуліся па каментары ў кампанію, а таксама да CEO мінскага офіса, але адказаў не атрымалі. 

На пачатку сакавіка стала вядома, што ЗША ўвядзе абмежаванні на імпарт тэхналогій у Беларусь. Раней такія абмежаванні былі ўведзеныя ў дачыненні да Расіі праз вайну ва Украіне. Пад санкцыі трапілі мікраэлектроніка, сэнсары, лазеры, навігацыйныя сістэмы, а таксама тэлекам-абсталяванне. Меркавалася, што абмежаванні закрануць прадукты, зробленыя не толькі ў ЗША, але і тыя, што зробленыя ў іншых краінах з удзелам амерыканскіх тэхналогій.

Услед за ЗША ЕС таксама на пачатку сакавіка ўвёў новыя абмежаванні на імпарт тэхналогій у Беларусь. Пад санкцыі патрапілі  перадавыя тэхналогіі, уключна з камп’ютарамі, электронікай, тэлекамунікацыйным абсталяваннем, датчыкамі і лазерамі.

Пры канцы сакавіка Паўднёвая Карэя таксама ўвяла абмежаванні на экспарт у Беларусь і Расію 57 нестратэгічных тавараў і тэхналогій. Пад санкцыі патрапілі, у прыватнасці, паўправаднікі і камп’ютарная тэхніка. Карэйскія кампаніі, зацікаўленыя ў экспарце тавараў са спісу, павінныя праходзіць асобную працэдуру ўзгаднення.