+1 вялікае скарачэнне ў беларускім геймдэве. Рыхтавалі гучны рэліз, але нешта пайшло не так

Гісторыя вялікага скарачэння ў варшаўскім офісе Playtika выклікала ланцуговую рэакцыю: пра масавыя звальненні вырашылі распавесці экс-супрацоўнікі студыі Swag Masha.

Паводле іх слоў, мінулым летам кампанія актыўна наймала людзей на праект Swag Toons — мабільная аплікацыя для чытання лічбавых коміксаў.

Як звольнілі

«Год таму пад старт новага праекта ішоў вельмі актыўны найм. Праект набіраў абароты. Кожны месяц прыходзілі новыя людзі», — распавядае пра гэты перыяд адна з супрацоўніц.

Рэліз аплікацыі, паводле словаў супрацоўнікаў, адбыўся ў красавіку гэтага года. А 12 мая студыя звольніла прыкладна палову калектыву. Тут дадзеныя некалькі разыходзяцца: адны налічылі 27 звольненых, іншыя — каля 40 з 80-і чалавек. Распавядаюць пра звальненне «ўсяго UX/UI дызайна», «практычна ўсяго аддзела маркетынгу», многіх мастакоў, арт-менеджараў і тых, хто займаўся лакалізацыяй.

«Пра звальненне паведамілі дзесьці ў другой палове дня: даслалі паведамленне ў Discord і на пошту, што ў кампаніі далей няма фінансавання, і мы спыняем супрацоўніцтва. На наступны дзень паштовыя скрыні заблакавалі і закрылі доступ да ўсіх працоўных акаўнтаў», — распавядае экс-супрацоўніца.

«Проста даслалі лісты з паведамленнем пра спыненне супрацоўніцтва, — кажа іншая. — І ў той жа вечар выдалілі ўсіх з працоўных чатаў. Ніякага папярэджання пра маючае адбыцца скарачэнне не было, ніякіх кампенсацый. Разлічыліся толькі за невыкарыстаны адпачынак, і ўсё. Большасць прымусілі падпісваць па пагадненні бакоў».

Паводле яе слоў, «калі чалавек не згаджаўся падпісваць па пагадненні бакоў і патрабаваў выплаты кампенсацыі, яму прапаноўвалі выходзіць у офіс на адзін працоўны гадзіну ў дзень (нават калі супрацоўнік працаваў дыстанцыйна з іншага горада)». Развіталіся не вельмі прыгожа — рэзюмуе яна.

Іншыя супрацоўнікі пацвярджаюць, што іх прымусілі скасаваць кантракты па пагадненні бакоў: маўляў, думалі, што «ўсё будзе нармальна: нават калі і скароцяць, то паводле Працоўнага кодэкса РБ выплацяць кампенсацыю і выходную дапамогу». Аднак жа «ў кампенсацыі ўсім адмовілі, матывуючы тым, што ў кампаніі няма грошай, можа не хапіць нават на заробкі ў наступным месяцы».

Таксама супрацоўнікі распавядаюць, што не ўсе былі працаўладкаваныя праз беларускую юрыдычную асобу, частка працавала з юрасобай у ААЭ як самазанятыя. Кампенсацый яны таксама не атрымалі і не вельмі спадзяюцца, бо ў іх дамовах прапісана, што «спрэчкі рэгулююцца заканадаўствам ААЭ».

Чаму скарацілі праект

У супрацоўнікаў мала інфармацыі пра гэта. Ім паведамілі пра спыненне (ці скарачэнне) фінансавання з боку матчынай кампаніі My.Games.

Мы папрасілі пракаментаваць сітуацыю сузаснавальніка Swag Masha Аляксея Карнеева, але не атрымалі адказу. Таксама напісалі ў офіс My.Games — апублікуем адказ, калі атрымаем.

Над чым працуе Swag Masha

Раней Swag Masha была вядомая як распрацоўшчык гульняў у жанры інтэрактыўных гісторый. Менавіта пасля поспеху Love Sick: Interactive Stories (3 мільёны запамповак за паўгода пасля рэлізу) у 2019 годзе студыю набыла Mail.ru Group. У ліпені 2019 года My.Games (гульнявое падраздзяленне Mail.ru Group) абвясціла пра «поўную кансалідацыю» з беларускай геймдэв-студыяй Swag Masha.

У кастрычніку 2022 года VK (раней Mail.ru Group) прадала 100 % My.Games Аляксандру Чачаве, менеджару і партнёру венчурнага фонду Leta Capital, за $642 млн. Штаб-кватэра My.Games цяпер знаходзіцца ў Нідэрландах.

На сайце студыі па-ранейшаму пазначаны тры гульні: Dream Zone, Love Sick і Love Sparks. Аднак, паводле словаў супрацоўнікаў, новы кантэнт для іх ужо даўно не распрацоўваецца, гульні толькі тэхнічна падтрымліваюцца. Галоўным праектам студыі апошні год была аплікацыя Swag Toons.

У PlayMarket яно падпісанае як прадукт Swag Global, «комиксы на русском, любовные истории, роман новелла, фото комикс», узрост 16+. Колькасць запамповак — 10 тысяч+, водгукаў няма. Разам з версіяй у App Store у аплікацыі у суме крыху больш за 20 тысяч запамповак.

Што магло пайсці не так. Меркаванне эксперта

Мы спыталіся ў незалежнага распрацоўшчыка гульняў, што магло пайсці не так з праектам. Ён пацвердзіў, што 20 тысяч запамповак — гэта вельмі мала.

— Выглядае як мінімальны тэст, — выказаў здагадку наш эксперт. — Але цікава нават не гэта, а тое, што быў няняты вялікі калектыў для працы над праектам, шанцы якога можна ацаніць толькі пасля тэсту. Звычайна тыя, хто мае досвед у гульнях, так не робяць. Найверагодней, інвестар чакаў, што гэта будзе каманда для больш маштабных планаў.

Гэта тэарэтычныя разважанні. Як было насамрэч, ведаюць толькі працадаўцы. Апублікуем іх адказы, калі яны будуць.