Таемны ШІ-аддзел Meta трывожыць інвестараў: ніхто не ведае, чым ён займаецца

Як адзначае Financial Times, мільярды даляраў накіроўваюцца на прыцягненне вядучых спецыялістаў па штучным інтэлекце з OpenAI, Apple, Google і іншых кампаній, якім прапануюць рэкордныя заробкі — сотні мільёнаў даляраў за некалькі гадоў працы.

Superintelligence Labs была створана ў асобным офісе на кампусе Meta ў Менла-Парку і працуе ў ізаляцыі ад астатніх ШІ-падраздзяленняў кампаніі. Паводле дадзеных інсайдэраў, нават унутры кампаніі пра дзейнасць лабараторыі вядома вельмі мала, а інвестары і аналітыкі чакаюць далейшых тлумачэнняў ад кіраўніцтва.

Лабараторыю ўзначалілі экс-кіраўнік Scale AI Аляксандр Ван і былы генеральны дырэктар GitHub Нэт Фрыдман. Паводле інфармацыі выдання, у Superintelligence Labs ужо працуюць каля 50 топ-спецыялістаў, а выдаткі на праект могуць дасягнуць $3,5 мільярдаў у год. Агулам на ШІ-каманду Meta ў 2025 годзе кампанія вылучыла рэкордны бюджэт, павысіўшы гадавы прагноз капітальных выдаткаў да $72 мільярдаў.

У самой Meta тлумачаць, што стаўка на ШІ — вымушаная мера пасля таго, як іх мадэлі Llama 4 саступілі канкурэнтам. На думку Цукерберга, укладанні ў інфраструктуру і кадры акупяцца за кошт «вельмі моцнай бізнес-мадэлі Meta». У адкрытым лісце для інвестараў ён падкрэсліў, што мэта — стварэнне «персанальнага суперінтэлекту» як інструмента для асабістай лічбавай падтрымкі карыстальнікаў, а не толькі для аўтаматызацыі рутынных задач.

Нягледзячы на поспехі ўкаранення ШІ ў рэкламны бізнес і рост акцый Meta на 20% з пачатку года, эксперты адзначаюць занепакоенасць рынкаў — праект пакуль не раскрыў канкрэтных прадуктаў, а бюджэтныя перспектывы выглядаюць няпэўна. Крытыкі ўказваюць, што раней Цукерберг ужо рабіў маштабныя стаўкі на новыя тэхналогіі: мета-сусвет так і не прынёс абяцанага прыбытку, а Reality Labs з 2020 года прынесла больш за $60 мільярдаў страт.