Аддзел навін 20 ліпеня 2023, 10:33

Apple распрацоўвае свайго канкурэнта ChatGPT

Apple употай тэсціруе штучны інтэлект накшталт ChatGPT ад OpenAI, Google Bard і Microsoft Bing AI, даведаўся Bloomberg.

Паводле слоў крыніц выдання, у Apple ужо ёсць фірмовая сістэма для стварэння вялікіх моўных мадэляў пад назвай Ajax. Яна пабудаваная на базе фрэймворка машыннага навучання Google Jax і легла ў аснову чатбота, які ў коле распрацоўшчыкаў называюць Apple GPT.

Таксама суразмоўцы Bloomberg сцвярджаюць, што ў апошнія месяцы Apple вядзе актыўную працу ў АІ-кірунку. На праекце занятыя некалькі каманд, якія сярод іншага прадумваюць пытанні абароны прыватнасці карыстальнікаў, звязаныя з тэхналогіяй.

У Apple адмовіліся ад каментароў. Каціроўкі кампаніі на навінах падняліся на 2,3% да рэкордных $198,23. Microsoft жа — галоўны партнёр і спонсар OpenAI — наадварот асела на 1%.

Samsung забараніла супрацоўнікам карыстацца ChatGPT і падобнымі — аж да звальнення

Фрэймворк Ajax быў створаны летась для сістэматызацыі распрацовак у сферы машыннага навучання. Apple GPT таксама быў створаны пры канцы мінулага года ў якасці эксперымента невялікай групай інжынераў. Яго рэліз быў адкладзены праз патэнцыйныя праблемы з бяспекай генератыўнага АІ. Цяпер ён даступны абмежаванаму колу супрацоўнікаў Apple па спецыяльным дазволе. Чатбот умее рэзюмаваць тэксты і адказваць на пытанні, а таксама дапамагае ў праектаванні прадуктаў. Паводле слоў супрацоўнікаў, па сваёй сутнасці гэта аналаг Bard, ChatGPT і Bing AI і будзь-якімі інавацыйнымі магчымасцямі ён не валодае.

Чатбот даступны праз вэб-праграму і прызначаны толькі для ўнутранага выкарыстання. Куперцінская кампанія ўзмоцнена працуе над паляпшэннем мадэляў, якія ляжаць у аснове, але выпускаць яго на публіку пакуль не плануе і выразнай стратэгіі вываду АІ-прадуктаў на рынак у яе пакуль няма. Але крыніцы выдання сцвярджаюць, што Apple рыхтуе буйны АІ-анонс налета.