У Telegram з'явілася расшыфроўка відэапаведамленняў. Але толькі па падпісцы

Месенджар запусціў новую функцыю — «тэмы», або асобныя чаты ўнутры асноўнай групы для абмеркавання канкрэтных тэм. Функцыя даступная для адміністратараў груп, у якіх больш за 200 чалавек. Для кожнай тэмы можна наладзіць апавяшчэнні, ва ўкладцы «Медыя» можна праглядаць файлы, якія былі апублікаваныя менавіта ў ёй.

Таксама Telegram дазволіў прывязваць некалькі калекцыйных публічных імёнаў да аднаго акаўнта, у дадатак да асноўнага ніка. Цяпер імёны можна купіць на аўкцыёне для продажу нікнэймаў на платформе Fragment.

У карыстальнікаў падпіскі Premium стала даступная расшыфроўка відэапаведамленняў. Таксама месенджар дадаў новыя наборы эмодзі, абнавіў начны рэжым на iOS, на Android змяніліся налады памеру тэксту. Кампанія адзначыла, што збіралася выпусціць абнаўленні раней, але праверка Apple заняла два тыдні.