Telegram заблакаваў найбуйнейшы чат беларусаў Беластока пасля атакі з расійскага нумара

Паводле слоў адміністратараў, прычынай блакіроўкі стала мэтанакіраваная атака з акаўнта, зарэгістраванага на расійскі нумар. 17 красавіка ў 0:53 зламыснік размясціў у чаце кантэнт «для дарослых», з-за чаго ўмяшалася служба мадэрацыі Telegram.

Парушальніка аператыўна заблакавалі, а нелегальны кантэнт выдалілі на працягу паўгадзіны. Тым не менш нехта паспеў зрабіць скрыншот паведамлення і накіраваць скаргу ў адміністрацыю мэсэнджара.

Напярэдадні адміністратары чата заўважылі, што да яго пачалі масава далучацца акаўнты, прывязаныя да расійскіх нумароў. Яны ўжо звярнуліся ў падтрымку платформы і чакаюць аднаўлення працы ў бліжэйшы час.

Чат быў створаны ў 2020 годзе і першапачаткова аб’ядноўваў беларусаў, што пакінулі краіну пасля пратэстаў і рэпрэсій. Пасля пачатку вайны ва Украіне да супольнасці далучыліся мясцовыя ўкраінскія ўцекачы. Да блакіроўкі ў ёй было 7418 падпісчыкаў.